Өндөрхаан-Чойбалсан чиглэлийн 143 км замыг эргэн төлөгдөх нөхцөлтэйгөөр “Насны зам” компани тавьж 2011 онд дуусгахаар ажлаа эхэлсэн байна.
Дээрх замтай холбоотой бас нэг шинэ мэдээлэл нь Монгол улсын Засгийн газрын 2011 оны 4 дүгээр сарын 06-ны өдрийн 105 дугаар тогтоолын 2 дугаар хавсралтаар батлагдсан Шууд гэрээ байгуулан гүйцэтгүүлэх авто замын барилгын ажлын жагсаалтад Өндөрхаан-Чойбалсан чиглэлийн 40,4 тэрбум төгрөгийн өртөгтэй 94 км урт хатуу хучилттай замыг 2011-2012 онд барьж дуусгах ажлыг оруулжээ. Энэ замыг ямар нэг тендер зарлалгүй шууд гэрээгээр Чойбалсан хотоос угтуулан тавих нь чухал гэдгийг П.Алтангэрэл гишүүн онцолж байлаа.
Уг 94 км замын ажлын зураг төсөлд Чойбалсан хотын доторхи замыг шинэчлэн сайжруулах ажил багтсан нь нэг давуу тал бөгөөд орон нутгийн компаниудаар уг ажлыг гүйцэтгүүлэх нь чухал болохыг онцолж байлаа. Харин энэ чиглэлийн замын хувьд өмнө нь тавигдсан 50 км замын үнийн зөрүү болох 8 тэрбум төгрөгийн хөрөнгийг шийдвэрлэх явдал хамгийн бэрхшээлтэй болохыг дурьдаад Засгийн газрын тэргүүнийг анхааралдаа авахыг хүслээ. Ийнхүү зүүн чиглэлийн хатуу хучилттай замын хувьд төр засгийн холбогдох шийдвэр, техник эдийн засгийн үндэслэл бүрдэж одоо зөвхөн барьж гүйцэтгэх ажил үлдэж байгааг онцлохын зэрэгцээ газрын тосны тухай хуулийн шинэчилсэн төсөл өргөн барьсан боловч шийдэгдэхгүй удаж байгаа, Халхгол суманд хэрэгжих төслийн ач холбогдол зэрэг цаг үеийн шинжтэй асуудлуудаар мэдээлэл хийж, энэ төслийн талаар буруу ташаа ойлголт, мэдээлэл гарч байгааг анхааруулав.
Орон нутагт ажиллах үеэр хүний хөгжил сангаас хишиг, хувь хүртээх хэлбэрээр ахмад настны тэтгэврийн зээл болон малчдын банкны зээлийн төлбөрийг барагдуулах талаар иргэдээс олонтаа хүсэлт тавьдаг бөгөөд УИХ-ын гишүүн П.Алтангэрэл дээрх асуудлыг хуульчлан тусгахаар “Хүний хөгжил сангийн тухай” хуульд нэмэлт оруулахаар төсөл санаачилж засгийн газраас санал авахаар хүргүүлсэн тухайгаа мэдээллэв.
Төрөөс малчдын талаар баримтлах бодлого, “Монгол мал” үндэсний хөтөлбөрийн хүрээнд зохион байгуулагдаж буй зүүн бүсийн хэлэлцүүлэгт байнгын хорооны дарга оролцож, хөдөө аж ахуйн салбарт явуулж буй бодлогыг хэрэгжүүлэхэд төв, орон нутгийн төр захиргааны болон мэргэжлийн байгууллагууд иргэд, малчдын идэвхитэй оролцоо, хамтын ажиллагаа, бүтээлч санаачлага, оновчтой шийдэл чухал болохыг онцлоод зөвлөлгөөндөө идэвхитэй оролцохыг хүслээ.
Мөн тэрээр Халхгол сумын төвд хийсэн иргэдийн уулзалтад оролцож засгийн газраас хэрэгжүүлж буй “Халх голын бүс нутгыг сэргээн хөгжүүлэх” ажлын ач холбогдол, нутгийн иргэдийн оролцоо, хамтын ажиллагаа, орон нутгийн хөгжилд оруулах хувь нэмрийн талаар онцлон ярьсан билээ.
УИХ-ын гишүүн П.Алтангэрэл Ерөнхий сайд албаны бусад хүмүүсийн хамт БНХАУ-ын Петро Чайна Дачин Тамсаг компанийн газрын тосны хайгуул олборлолтын байдалтай газар дээр нь танилцаж байгаль орчны нөхөн сэргээлт, орон нутгийн хөгжилд оруулж буй хөрөнгө оруулалт зэрэг удаашралтай, явуулын сэтгэлгээгээр хандаж байгаа талаар хатуухан шүүмжлэл хэлж, өөрийн байр сууриа илэрхийллээ. Тэрээр нөхөн сэргээлтийн ажлыг Монголын компаниудаар хийлгэж, энэ чиглэлийн мэргэжилтэн бэлтгэх нь ирээдүйд ач холбогдолтой хэмээн үзэж нөхөн сэргээлтийн ажил хийхээр бэлтгэж байгаа Монголын зарим компани, мэргэжилтнүүдтэй биечлэн уулзаж санал бодлоо солилцсон байна.
| Дорнод аймагт өсвөрийн шатарчдын "Босоо Бэрс" клуб шинэчлэн байгуулагдлаа | УИХ-ын гишүүн П.Алтангэрэл 2010 оны намрын чуулганы завсарлагаанаар тойрогтоо ажиллалаа |
|---|
