Хичээлийн шинэ жилийн босгон дээр Дорнод аймгийн оюутан залуус нутгаа тойрон аялаад иржээ.Дорнодын оюутан залуусын нэгдсэн холбооноос санаачлан зохион байгуулсан энэхүү тойрон аяллыг УИХ-ын гишүүн П.Алтангэрэл дэмжин,хамтарч оролцсон юм байна. Энэхүү “Дорнод аялал”-ын гол зорилго нь Дорнод аймгийн нутгийг тойрсон түүх, газарзүйн дурсгалт газруудыг багтаасан аялал жуулчлалын маршрут бий болгоход чиглэжээ. Тиймээс аяллынхан Дорнод аймгийн Баян-Уул сумын нутгаас гараагаа эхэлж, Чингисийн нагац нар болох олхонуудын нутаг Ульхан уул, Өэлүн эхийн төрсөн газар босгосон овоо, Тэмүүжин, Тоорил нар хүч хавсран татаарыг дарсан Улзын Нарст шүтээн, Чингисийн алдарт хэрмэн зам, Чингисийн худаг, Есүхэй баатар татааруудад хорлогдсон Цэгцэрийн шар тал, татаар, хонгирад зэрэг аймгууд нутаглаж байсан Буйр нуур, Халхын гол зэрэг түүхийн улбааг хадгалсан нутгаар аялжээ. Мөн Монголын хамгийн нам дор газар Хөх нуур, Монгол, Орос, Хятад гурван улсын хилийн уулзвар Тарваган дахын овоо, Төв Азийн тэгш өндөрлөг дэх цорын ганц хялганат тал хэмээгддэг Мэнэнгийн тал зэрэг газарзүйн тогтоц, байгалийн үзэсгэлэнгээрээ олныг бишрүүлсэн нутгаар аялсан байна. Цаашид “Дорнод аялал”-ыг улам өргөжүүлэн зураач, гэрэл зурагчид, зохиолч, сэтгүүлчид болон эрдэмтэн, судлаачдыг хамруулан, Дорнод нутгийн байгалийн үзэсгэлэн, түүхэн дурсгалт газруудыг тэдний уран бүтээлийн нэг сэдэв болгох зорилго агуулж байгаа ажээ.