Дорнод аймагт Зүүн хойд Азийн бүсийн чуулган 09-р сарын 20-21-ны хооронд болж чуулганаар Зүүн хойд Азийн хөгжилд Дорнод аймаг ямар үүрэгтэй оролцох вэ гэдгийг тодорхойллоо.

Уг чуулганд УИХ-ын гишүүн, Байгаль орчин, хүнс, хөдөө аж ахуйн байнгын хорооны дарга П.Алтангэрэл, УИХ-ын гишүүн Э.Бат-Үүл, Ц.Сэдванчиг, нэг ази Улаанбаатар нийгэмлэгийн тэргүүн Р.Бадамдамдин, нэг ази Улаанбаатар нийгэмлэгийн гүйцэтгэх захирал Я.Эрхэмбаяр, ЕТГ-ын Е.Гэрэлчулуун, зүүн хойд ази нийгэмлэгийн тэргүүн Б.Баабар, “Нэтко” ХХК-ийн захирал Б.Цэнддоо, насны зам ХХК-ний гүйцэтгэх захирал н.Болормаа, аймгийн засаг дарга Ц.Жанлав холбогдох агентлагийн дарга болон Япон, БНСУ-ын төлөөлөгчид, БНХАУ-аас манай улсад суугаа Элчин сайд,  эрдэмтэн судлаачид, орон нутагт үйл ажиллагаа явуулдаг  бизнес эрхлэгчид оролцож, санал бодлоо солилцлоо.

Манай улсаас Зүүн хойд Азийн бүсэд Дорнод аймаг багтдаг юм. Зүүн хойд Азийн бүсийн нутгууд хурдацтай хөгжиж буй үед үүнд Дорнод аймаг идэвхтэй оролцох хэрэгтэй гэдгийг уг чуулганыг зохион байгуулж буй УИХ-ын Байгаль орчин, хүнс, хөдөө аж ахуйн байнгын хорооны дарга П.Алтангэрэл онцолж байв. Тэрбээр чуулганы үеэр “Дорнод-байгаль орчин”, “Дорнод-аялал жуулчлал”, “Дорнод-хөдөө аж ахуй” гэсэн сэдвээр гол илтгэлүүдийг тавьжээ.

Өмнө нь яриа төдий байсан ажил чуулганы дараа бодитоор хэрэгжиж, Дорнодын хөгжилд ихээхэн ач холбогдолтой зүйл болно гэдэгт зохион байгуулагчид нь найдаж байгаа ажээ. Халх голын бүсийг сэргээн хөгжүүлэхэд Зүүн хойд Азийн хөгжилтэй хэрхэн уялдуулах вэ гэсэн асуудлыг мөн энэ үеэр хөндсөн бөгөөд Халх голын бүс нь Зүүн хойд Азийн бүсийн улс орнуудыг цэвэр экологийн хүнсний бүтээгдэхүүнээр хангадаг байх зэрэг тодорхой асуудлуудыг ярьж хоёр өдөр чуулсан чуулган маш үр дүнтэй, чуулганаас хэлэлцэгдэж гарсан асуудлууд нь Дорнод бүсийн хөгжилд томоохон хөшүүрэг болох ажил хэрэг болох юм байна.

 

Хүнс барааны төрөлжсөн зах, худалдаа үйлчилгээний газруудаар оров		Дорнодод түүхэн газарзүйн аялалыг хөгжүүлнэ