Ерөнхий боловсролын сургууль, цэцэрлэгийн барилга байгууламжийн хүрэлцээ, хангамж улсын хэмжээнд тааруу байгаа ажээ.

Хэдийгээр 2008-2012 онд 86 сур­гуулийн хичээлийн, 141 цэцэр­лэгийн, 40 дотуур байр, 62 спорт заал барьсан ч хүн амын өсөлт, ерөнхий боловсролын тогтолцоо 12 жилд шилжсэн зэргээс шалтгаалан хүчин чадал нь хүрэлцэхгүй байгаа юм. Мөн зарим барилга байгууламж хуучран, ашиглах боломжгүй болж байгаа нь ч нөлөөлж байгаа бөгөөд одоогийн байгаа сургуулийн байрны 25, цэцэрлэгийн байрны 22 хувь нь ашиглах боломжгүй болоод байгаа бол дотуур байрны 10 гаруй хувь нь стандартын шаардлага хангахгүй байна. 2011 оны байдлаар гэхэд цэцэрлэгийн насны 219 мян­ган хүүхдийн 60 гаруй хувь нь л цэ­цэрлэгт хамрагдаж байна. Харин 2011-2012 он хичээлийн жилд 131 бүлгийн 4000 гаруй сурагч гурав­ду­гаар ээлжинд хичээллэж байгаа ажээ.

Жил бүр цэцэрлэгийг  3000  ороор нэмэгдүүлж байгаа ч эрэлт нь 6000-аар нэмэгддэгийн дээр ашиглалтын хугацаа дууссан зэрэг шалтгаа­наар 5000-аар хорогдож, сургуу­лийн суудлын тоог 5.5 мянгаар нэмдэг ч 20.5 мянгаар хорогдож байдаг аж. Энэ бүхнээс шалтгаалан цэ­цэр­лэг, ерөнхий боловсролын сур­гуулийн хичээлийн байр болон дотуур байр, биеийн тамирын заал­ны барилгын хүчин чадлын хомсд­лыг шийдвэрлэх, хангамжийг хэвийн болгохын тулд 2015 он гэхэд 1121 барилга байгууламжийг барих шаардлагатай байгаа бөгөөд үүнд 1.2 их наяд төгрөг шаардагдах юм.

Энэ талаар хөрөнгө оруулалт, санхүүжилттэй холбоотой тулгам­даж байгаа асуудлыг шийдвэр­лэхээр Нийгмийн бодлого, боловс­рол, соёл, шинжлэх ухааны байнгын хо­рооны ажлын хэсэг байгуулжээ. Тус ажлын хэсэг УИХ-ын гишүүн А.Тлейхан, С.Эрдэнэ, Д.Дондог, Д.Очирбат, П.Алтангэрэл нарын бүрэлдэхүүн­тэй ажиллаж байна. Ажлын хэсэг асуудлаа удахгүй эцэслэн тогтоолын төслийг УИХ-д өргөн барих юм.