Өнгөрсөн баасан гаригийн 11.00 цагт  ХБНГУ-ын Ерөнхийлөгч Кристиан Вульф мэдэгдэл хийхээр  Белвью ордондоо хэвлэл мэдээл­лийн төлөөлөгчдийг цуглуулсан юм. Тэрбээр сэтгүүлчид цугларсан танхимд орж ирээд  төрийн тэр­гүү­ний албанаас огцорч буйгаа мэ­дэг­дэв. "Германд улс орны дотоод болон гадаад харилцаатай хол­боотой асуудлыг шийдэхэд өөрий­гөө бүрэн зориулж чадах  төрийн тэргүүн хэрэгтэй. Өөрөөр хэлбэл, ард иргэдийнхээ итгэлийг хүлээсэн Ерөнхийлөгч хэрэгтэй. Сүүлийн долоо хоногуудад өрнөсөн үйл явдлаас үзэхэд ийм итгэл алга болсон байна. Тиймээс би өнөөдөр албан тушаалаасаа огцорлоо" хэмээн хэлээд алдаа гаргасан гэдгээ ч хүлээн зөвшөөрөв.

Ерөнхийлөгч  Кристиан Вульф­тэй холбоотой хээл хахуулийн хэргийн талаар Германы хэвлэл мэдээллээр хэдэн сарын туршид шуугисан юм. Кристиан Вульф нь 2010 оны зургадугаар сарын 30-ны өдөр А.Меркелийн тэргүүлдэг Христосын ардчилсан эвслээс Ерөнхийлөгчөөр сонгогдсон. Тэр­бээр ХБНГУ-ын түүхэнд хамгийн богино хугацаанд төрийн тэр­гүү­ний албыг хашсан улстөрч бол­лоо. 2003-2010 онд Нидерсаксон мужийн Ерөнхий сайдаар ажиллаж байхдаа Ханнофер хотын ойрол­цоо байшин худалдаж авахаар бизнесмен, найз Эргон Гер­кен­сийн эхнэр Эдит Геркенсээс 500 мянган евро  маш бага хүүтэйгээр зээлсэн аж. К.Вульф анхныхаа эхнэрээс салж, залуухан бүсгүйтэй гэрлээд удаагүй байсан үе. Олон жил найзалсан бизнесмен найзаа­саа  зээл авсан нь албан тушаалаа ашигласан хэрэг мөн үү хэмээх  улс төрийн хүрээнд төрдийгүй  нийгэм даяараа ярих болсон аж.  Үүнээс л хамаг хэрэг үүдсэн юм. Мужийн Ерөнхий сайд байхдаа зээл авсан тухай нь Германы "Bild" сонины сэтгүүлчид  нягтлан судалж нийт­лэл гаргахаар бэлдэж байв.  Ерөн­хийлөгч К.Вульф Кувейтэд амарч байхдаа энэ талаар мэдээд "Bild" сонины ерөнхий эрхлэгч Кая Дикманн руу утасдаж сүрдүүлсэн аж. Энэ та­лаар тус сонины ерөн­хий эрхлэгч хожим нь олон нийтэд мэдэгдсэн юм. Ёстой л нөгөө гал дээр тос гэгч нь болж,  хожим нь Ерөнхийлөгч тус сонины ерөнхий эрхлэгчээс уучлал гуйсан боловч нэмэр болсонгүй. К.Вульф хэвлэл мэдээллийнхэнд нэг бус удаа шахалт үзүүлэхийг оролдсон гэдэг нь ч илэрсэн. "Welt am Sonntag" сониныхон түүний тун ч зохисгүй үйлдлийн  талаар баримт нийтлэх гэж байгааг мэдээд утасдаж түү­нийг нь гаргахгүй байхыг шаардсан аж.  Сүүлийн хэдэн сарын турш ХБНГУ-ын экс Ерөнхийлөгч   чинээ­лэг найз нарынхаа зардлаар тан­саг зочид буудалд бууж, хилийн чанадад амарсан гээд нэлээд ба­рим­туудыг олон нийтэд мэдээлсэн.

Тиймээс ч  К.Вульфийн  талаарх хэргийг Ханновер хотын прокурор удахгүй шалгаж эхлэхээр болж,  өнгөрсөн пүрэв гаригт Бундестагт хандан төрийн тэргүүний бүрэн эрхийг нь түдгэлзүүлэх хүсэлт тавьсан аж. Түүнээс нэг хоногийн дараа Германы бүх хэвлэл мэдээл­лийн хэрэгсэл Ерөнхийлөгч К.Вульф огцорсон талаар  өдөр­жин­­гөө мэдээлсэн юм. Ингэхдээ за­рим судлаач, шинжээчдийг теле­ви­зийн студид урьж, төрийн тэр­гүүн бай­сан улстөрчийг ямар ирээ­дүй хү­лээж байгаа талаар хүртэл ну­хац­тай нь аргагүй авч хэлэлцэв. Улс төр судлаачдын үзэж буйгаар К.Вульфд улс төрд орон зайгүй бол­сон  бөгөөд нэлээд хэмжээний зээл­тэй учир санхүүгийн хувьд ч бай­дал нь хүндрэх аж.  Хам­гийн гол нь ард иргэдийн итгэл үгүй болсон гэж түүний хэлсэн нь яах аргагүй үнэн юм.