УИХ-ын гишүүн Л.Гүндалайгаас Цагаан сарын баярыг хэрхэн тэмдэглэдэг талаар сонирхлоо.

-Баясгалан хэмээх усан луу жил гарах гэж байна. Та Цагаан сараар хэрхэн баярладаг вэ?

-Монголчуудынхаа адил шинийн 1-нд ахмад буурлууддаа золгож, байгаль дэлхийдээ залбирдаг. Цагаан сар бол Азид л байдаг баяр. Монголын цагаан сар гээд бусдаасаа өөр өдөр тэмдэглэдэг учрыг олохгүй байгаа юм. Уг нь, хамтад нь тэмдэглэчихвэл амар юм шиг санагддаг.

-Танайх Цагаан сараар ууц тавьдаг уу?

-Манайх ууц тавьдаггүй. Даруухан тэмдэглэх дуртай.

-Та хэр олон айлаар орж золгодог вэ?

-Цагаан  сараар олон  айл хэсээд байдаггүй. Аль болох гэртээ, хүүхдүүдтэйгээ цагийг өнгөрөөхийг илүүд үздэг.

-Зочдодоо ямар бэлэг өгөхийг илүүд үздэг вэ?

-Бэлэг өгдөг ёсыг хэт хавтгайруулж болохгүй болов уу гэж боддог. Би хүүхдэд урам өгөх дуртай. Ингэснээр хүүхэд урам зоригтой болж, хичээл зүтгэл гаргаж, илүү амжилтад хүрнэ гэж боддог. Гэхдээ элдэв жижиг сажиг янз бүрийн бэлэг өгч байхаар амьдралд нь хэрэг болох таксины мөнгө ч болтугай өгсөн нь дээр. Оюутнуудад бол 20 мянган төгрөг өгөхөд их баярладаг.

-Хүүхэд байхдаа Цагаан сарыг тэсэн ядан хүлээдэг байв уу?

-Тэгэлгүй яахав. Биднийг хүүхэд байхад улсын наадам, Цагаан сар хоёр л хамгийн гоё баяр байлаа. Хүүхдийн баяр гэж тэмдэглэдэггүй, тухайн үед мэддэг ч үгүй байсан. Одоогийнх шиг чихэр, жимс элбэг ч байгаагүй. Тийм болохоор би Цагаан сарыг тэмдэглэхээр хүүхэд насаа дурсаад сайхан байдаг юм.