Эрүүл мэндийн дэд сайд Ж.Цолмон 2012 оэы 1-р сарын сүүлийн долоо хоногт Улсын клиникийн төв эмнэлэг, Хавдар судлалын үндэсний төв, Эх хүүхдийн эрүүл мэндийн үндэсний төв зэрэг нийслэлийн хэд хэдэн томоохон эмнэлгүүдээр явж, үйл ажиллагаатай нь танилцаж, үйлчлүүлж байгаа иргэдтэй уулзаж санал бодлыг нь сонсов. Дэд сайдыг Эх хүүхдийн эрүүл мэндийн үндэсний төвийн Эх барих эмэгтэйчүүдийн эмнэлгээр ороходНөхөн үржихүйн кабинетээр жилд 4 мянга орчим хүн үйлчлүүлдэг тухай тус эмнэлгийн захирал С.Хишигээ танилцуулав.

Мөн Үр хөндөлтийн тасгаар жилдээ 2 мянга орчим эмэгтэй үйлчлүүлдэг, тэдний нэлээд хувийг хүсээгүй жирэмслэлттэй оюутан охид эзэлдэг, түүнчлэн 40 орчим хувь нь суурь өвчтэй учраас хүүхдээ тээх боломжгүй эмэгтэйчүүд байдаг. Үр хөндүүлж байгаа эмэгтйэчүүдийг үр хөндөлтийн кабинетаар үйлчлүүлсэн гээд бүртгээд өнгөрөх биш цаашдаа харьялагдах дүүрэг хорооных нь эмч нартай нь хамтран гэр бүл төлөвлөлтийн сургалтанд хамруулах хэрэгтэй байгааг салбарын дэд сайд онцлон хэлэв.

Эрүүл мэндийн дэд сайд Ж.Цолмон Эх хүүхдийн эрүүл мэндийн үндэсний төвийн Төрөх тасаг болоод Хүүхдийн тасаг, Хүлээн авах тасгаар мөн оров. Эмнэлгээр үйлчлүүлэхээр ирж байгаа хүмүүстэйгээ эмнэлэгт орж ирсэн цагаас нь л сайн ойлголцож байх хэрэгтэйг дэд сайд зөвлөөд, хүмүүс эмнэлгийн хаалгаар орж ирүүт л тариа хийлгүүлж, дусал залгуулна гэж ойлгоод байдаг.

Гэтэл үзлэг, шинжилгээ хийж, оношийг нь тодруулахаас эхлээд зайлшгүй дамжих үйлчилгээ, цаг хугацаа хүлээгдэх шаардлага гардаг гэдгийг үйлчлүүлэгчиддээ ойлгуулж байх хэрэгтэй гэж Цолмон сайд зөвлөв. Дэд сайд эмнэлгийн үйлчилгээний талаар иргэдээс асууж явлаа.

Иргэд Эх хүүхдийн эрүүл мэндийн үндэсний төвийн эмч нарт үзүүлэхийн тулд заавал эмнэлэг дээр очиж цаг авах шаардлагагүй утсаар захилга өгөх боломж бүрдсэн байна. Цаашдаа Хүлээн авах тасаг хүмүүст карт өгдөг болох юм байна. Хэрвээ өвчтөнд улаан карт өгсөн бол яаралтай тусламж үзүүлэх, харин ногоон карт өгсөн бол зохих тусламж үйлчилгээг үзүүлэх аж.