Ж.Алдаржавхлан: Ирэх сард хүүхдүүдээ хүлээж авахаар төлөвлөсөн сургуулийн үлдэгдэл 3 тэрбум төгрөгийн санхүүжилтийг төсвөөс хасчихсан байна

УИХ-ын гишүүн Ж.Алдаржавлан өнөөдөр /2025.11.06/ төсвийн хөрөнгө оруулалттай холбоотой ноцтой мэдээлэл өглөө.Тодруулбал, улсын төсвөөр хэрэгжүүлээд аравдугаар сарын 30-нд улсын комисс орсон, ирэх 12 дугаар сард хүүхдүүдээ авах байсан сургуулийн үлдэгдэл 3 тэрбумыг төсвөөс хасчихжээ. Улмаар тухайн мөнгийн нэр бүхий улстөрчдийн тойрог дээр тавьсан байна.“Яагаад ашиглалтад орох гэж буй сургуулиудыг ажлыг нь дуусгахгүйгээр танаад, өөр гишүүдийн тойрог дээр шагнал байдлаар тавьж буй асуудлыг хөндөж тавина. Өнөөдөр /2025.11.06/ ажлын хэсгийн хуралдаан дээр төсвийн хэлэлцүүлэг хийгдэнэ. Маргааш чуулганы хуралдаанаар орно. Яагаад хөрөнгө оруулалтыг өөрчлөв, энэ хүнд та бүхэн ямар өртэй болохыг би асууя гэж бодож байна” гэв.Төсөвт эхэлсэн ажлыг эцэслэх чухал зарчим байх ёстой.  Хан-Уул дүүргийн 15-р сургууль дахин төлөвлөлтөд орчихсон, дээрээс нь ачааллаа дийлэхээ больж нэг ангид 60-аад хүүхэд суралцаж байна. Гэвч ийнхүү үлдэгдэл санхүүжилтийг нь хасчихаар хэзээ ашиглалтад орох вэ гэдэг асуудал үүсэж байна.Хүүхдэд Үндсэн хуулиар олгосон сурч боловсрох эрхийг хангах чиглэлд хийгдэж буй ажлын хөрөнгө оруулалтыг шударга бусаар өөрчилсний шалтгааныг заавал тодруулна хэмээн УИХ-ын гишүүн Ж.Алдаржавхлан тодотгов.Дэлгэрэнгүй ярилцлагыг эндээс үзнэ үү.