Т.Аубакир: ХБХХЕГ тохируулагч агентлаг болсноор аймаг бүрд хөгжлийн бэрхшээлтэй иргэнийг хариуцсан 3–4 албан хаагчтай болно

Монгол Улсын Ерөнхий сайд Хөгжлийн бэрхшээлтэй иргэдийн эрхийг хамгаалах өдрийг угтан хөгжлийн бэрхшээлтэй хүний эрхийг хангах чиглэлээр үйл ажиллагаа явуулж буй 21 төрийн бус байгууллагын төлөөлөлтэй 2025 оны 12 дугаар сарын 2-ны өдөр уулзсан. Тус уулзалтаар ТББ-аас Хөгжлийн бэрхшээлтэй хүний эрхийн хангах зөвлөлийн гишүүдийг нээлтэй сонгон шалгаруулдаг байх, томилох, чөлөөлөх хугацаатай болгох, хяналтын зөвлөл ажиллуулах асуудлыг журамд тусгах саналаа илэрхийлсэн.  Дээрх санал хүсэлтийг үндэслэн /2025.12.03/-ний өдөр Засгийн газрын хуралдаанаар “Хөгжлийн бэрхшээлтэй хүний эрхийг хангах зөвлөлийн ажиллах журам”-д нэмэлт өөрчлөлт оруулан баталлаа. Нэмэлт өөрчлөлтөд:Зөвлөлийн гишүүнээр ажиллуулах төрийн бус байгууллагын төлөөллийг нээлттэй сонгон шалгаруулах; гишүүнд тавигдах шаардлага, гишүүнээр ажиллах хугацаа; зөвлөлийн бүрэлдэхүүнд ажиллах төрийн бус байгууллагын төлөөллийн тоо, зөвлөл дэргэдээ бодлого, хяналтын баг ажиллах талаар асуудлуудыг тусгасан. Энэхүү журамд өөрчлөлт оруулснаар Хөгжлийн бэрхшээлтэй хүний эрхийг хангах зөвлөлийн бүрэлдэхүүнд төлөөллөө ажиллуулах боломжийг төрийн бус байгууллагуудад олгох,  гишүүнийг нээлттэй сонгон шалгаруулах замаар сонгох, зөвлөлийн дэргэд бодлого, хяналтын баг ажиллаж бодлогын зөвлөмж, хууль тогтоомжид тусгах санал боловсруулах, хууль тогтоомжийн хэрэгжилтэд хөндлөнгийн хяналт тавьдаг болно. Энэ нь төрийн байгууллагын үйл ажиллагааг иргэдэд  ил тод нээлттэй, үйлчилгээ түргэн шуурхай болох нөхцөл бүрдэх юм. ХБХХЕГ-ыг тохируулагч агентлаг болсноор аймаг бүрд хөгжлийн бэрхшээлтэй иргэнийг хариуцсан 3–4 албан хаагч ажиллах боломж бүрдэнэМөн хөгжлийн бэрхшээлтэй хүний хөгжлийн ерөнхий газрыг Монгол Улсын Ерөнхий сайдын эрхлэх асуудлын хүрээнд ажиллах Засгийн газрын тохируулагч агентлаг болгох тогтоолын төслийг боловсруулж  танилцуулахаар шийдвэрийг Засгийн газрын 2025 оны 12 дугаар сарын 3-ны ээлжит хуралдаанаар гаргалаа.Хөгжлийн бэрхшээлтэй хүний хөгжлийн ерөнхий газар нь үндсэн чиг үүргээ хэрэгжүүлэхэд орон тоо хүрэлцэхгүй, орон нутагт салбар нэгжгүйгээс иргэдэд хүрч үйлчлэхэд хүндрэл тулгардаг байсан. Тиймээс хөгжлийн бэрхшээлтэй хүний эрхийг хангах чиглэлээр үйл ажиллагаа явуулж буй 21 төрийн бус байгууллагын төлөөлөл тус агентлагийг Монгол Улсын Ерөнхий сайдын эрхлэх асуудлын хүрээний тохируулагч агентлаг болгох санал, хүсэлт гаргасны дагуу Засгийн газар ийн шийдвэрлэжээ. Шинэ зохион байгуулалтын хүрээнд аймаг, дүүрэг бүрт хөгжлийн бэрхшээлтэй иргэний асуудал хариуцсан 63 албан хаагчийг шинээр ажиллуулж, үйлчилгээний чанар, хүртээмжийг эрүүл мэнд, боловсрол, нийгмийн хамгааллын бүх чиглэлд сайжруулах боломж бүрдэнэ. Мөн хөгжлийн бэрхшээлтэй хүүхдийн салбар комиссын үйл ажиллагаа тогтвортой болж, эрт илрүүлэлт, оношилгоо, дэмжлэгийн тогтолцоо бэхжих нь гол ахиц байх юм.