Монгол, Казахстан хоёр улсын хамтын ажиллагааны асуудлаар өндөр түвшний ажлын уулзалт болов

 ШАДАР САЙД Х.ГАНХУЯГ КАЗАХСТАН УЛСЫН ШАДАР САЙД БӨГӨӨД ЭДИЙН ЗАСГИЙН САЙДТАЙ УУЛЗЛАА.Уулзалтаар хоёр улсын хамтын ажиллагааны суурь тулгуур болох худалдаа, эдийн засгийн хамтын ажиллагааг гүнзгийрүүлэх, бүсчилсэн хөгжил, чөлөөт бүс, эдийн засгийн тусгай бүсийн бодлого, хөрөнгө оруулалтын орчин, худалдааг хөнгөвчлөх, тарифын болон тарифын бус саад тотгорыг бууруулах асуудлаар дэлгэрэнгүй санал солилцов.Монгол, Казахстан хоёр улсын худалдааны эргэлт өнгөрсөн онд 121.5 сая ам.доллар (+5.5%) болж, үүнээс экспорт 113 сая ам.доллар, импорт 8.6 сая ам.доллар-т хүрснийг талууд дурдлаа. Казахстан Улсаас Монгол Улсад нийлүүлж буй экспортод тамхины бүтээгдэхүүн, рапсын үр, талх, гурилан болон кондитерийн бүтээгдэхүүн, хүнсний болон тосны ургамал, хөдөлгүүр, машин механизм зонхилж байгаа бол Монгол Улсаас Казахстан Улсад мах, махан бүтээгдэхүүн, ноолуур, гутал, хивс, ноосон эдлэл экспортлогдож байна. Мөн Монгол Улс, ОХУ, Бүгд Найрамдах Казахстан Улсын гурван талт хэлэлцээрийн хүрээнд Баян-Өлгий–Казахстан чиглэлд шинээр авто зам нээх асуудлаарх хэлэлцээ амжилттай үргэлжилж, талууд зохих түвшинд харилцан тохиролцоонд хүрснийг онцлон дурдав. Түүнчлэн энэ жил НҮБ-ын Цөлжилттэй тэмцэх конвенцийн Талуудын 17 дугаар хуралдаан Монгол улсад зохион байгуулах бөгөөд Казахстан Улсыг оролцохыг урилаа. Уулзалтын төгсгөлд Шадар сайд Х.Ганхуяг Монгол Улсын Ерөнхийлөгч У.Хүрэлсүхийн санаачилсан “Дэлхийн адууны өдөр”-ийг 2026 оны 7 дугаар сарын 13-нд Монгол Улсад зохион байгуулахаар төлөвлөж байгааг онцолж Монголын тал албан ёсоор Казахстаны талыг энэхүү арга хэмжээнд оролцохыг урив. Үүнд, БНКазУ-ын Шадар сайд бөгөөд Үндэсний эдийн засгийн сайд С.Жумангарин уг арга хэмжээний ач холбогдлыг өндрөөр үнэлж, энэхүү санаачилга нь хоёр ард түмний нүүдэлчин соёл, ахуй, түүхэн өвийг илэрхийлэх, олон улсын түвшинд сурталчлах өндөр ач холбогдолтой болохыг онцлов. Тэрбээр Казахстан Улс өнөөдрийн байдлаар ойролцоогоор 4 сая адуутай бөгөөд уг арга хэмжээнд идэвхтэй оролцох сонирхолтой байгаагаа илэрхийллээ. Уулзалтын үр дүнд талууд Монгол, Казахстан хоёр улсын хамтын ажиллагааг урт хугацаанд тогтвортой, харилцан ашигтай байдлаар хөгжүүлэх, эдийн засаг, худалдаа, чөлөөт бүс, хөдөө аж ахуй, цахим болон сансрын салбар дахь төсөл, хөтөлбөр, хамтарсан санаачилгаар үргэлжлүүлэхэд бэлэн байгаагаа илэрхийллээ..