Замын-Үүдийн авто замын боомтын ачаа тээврийн хэсэг 5 дугаар сарын 4-нөөс эхлэн уртасгасан цагаар ажиллана

Монгол Улсын хилээр орж ирж буй импортын барааны 70 гаруй хувийг шалган нэвтрүүлдэг Замын-Үүд боомтын үйл ажиллагаатай танилцлаа. Замын-Үүдийн авто замын боомтын ачаа тээврийн хэсэг 2026 оны 05 дугаар сарын 04 ний өдрөөс эхлэн уртасгасан цагаар өглөө 08:00 цагаас орой 21:00 цагийн хооронд ажиллана. Тус боомтоор өдөрт орж ирж буй ачааны автомашины тоо бүтээн байгуулалтын улирал эхэлж байгаатай холбогдуулан ачаалал ихэсч уртасгасан цагаар ажиллахад 600-650 ачааны авто машин гарч мөн тоогоор орж ирэх боломжтой болно одоо энэ тоо өдөрт 400 орчим байгаа гэж танилцуулав. Замын-Үүд дэх гаалийн газар нь нийт 263 ажилтантай. Өдрийн ачаалал нь нэг талдаа жижиг суудлын тээврийн хэрэгсэл 400 гаруй, 8000 орчим зорчигч гаалийн хяналтын бүсээр орж үйлчлүүлж байна. Өнгөрсөн сард ашиглалтад орсон “Барилгын материалын сорилт шинжилгээний түргэвчилсэн лаборатори” нь итгэмжлэглэлээ аваагүй байгаа тул хараахан үйл ажиллагаа нь эхлээгүй байна. Энэ лаборатори ажиллаж эхэлвэл барилгын материалын чанар стандартийг мөрдөх ба саяхан олны анхааралд өртсөн сургуулийн хананы будагт агуулагдаж байсан хар тугалганы хэмжээ их байсан гэх мэт асуудлыг шийдэхэд дөхөмтэй болно гэж гаалийн ажилтан тайлбарлаж байлаа. Улсын хилийн халдашгүй дархан байдлыг сахин хамгаалах үүргийг биелүүлж яваа Монгол Улсын өмнөд хил Замын-Үүд дэх Хилийн цэргийн 0108 дугаар ангийн бие бүрэлдэхүүнтэй уулзалт хийлээ. Олон саяар тоологдох зорчигч, тээврийн хэрэгслийг улсын хилээр шалган нэвтрүүлэх, хууль бусаар хил нэвтрүүлэхийг завдсан үйлдлүүдийг илрүүлж, улс орны эдийн засагт учирч болзошгүй их хэмжээний бодит хохирлоос урьдчилан сэргийлэх үүргээ биелүүлж яваа хилчиддээ ажлын өндөр амжилт хүсэн хилийн бүс, зурваст амьдарч буй орон нутгийн ард иргэддээ нээлттэй, тэднийг дэмжин ажиллаж байхыг хүслээ.