Р.Сэддорж: Малаа дайруулсан малчдын буруу болж, мал дайрсан машины эвдрэлийн төлбөрт ордгийг зохицуулах шаардлагатай!

Монгол Улсын Үндсэн хуульд мал сүрэг нь төрийн хамгаалалтад байна гэж заасан. Гэсэн ч бодит байдал дээр энэ заалт хангалттай хэрэгжихгүй байгааг хөдөө орон нутгийн иргэд хэлдэг. Ялангуяа улсын болон орон нутгийн чанартай авто зам дагуу мал дайруулах тохиолдол нэмэгдэж, үүний улмаас малчдын эдийн засагт бодит хохирол учирч байна. Төмөр зам дээр гэхэд л нэг сумаас 500 гаруй толгой мал дайруулж, тухайн малчинд хэдэн 10 сая төгрөгийн хохирол учруулсан тохиолдол бий. Гэвч малчид хуулийн байгууллагад гомдол гаргадаггүй эсвэл шийдвэрлэх процесс урт, төвөгтэй байдаг хэмээн үзэж асуудлыг орхих нь түгээмэл.Иймд замын хөдөлгөөний дүрэмд орон нутгийн онцлогт нийцсэн өөрчлөлт оруулах мал хамгаалах зохицуулалтыг боловсронгуй болгох мөн төмөр болон авто зам дагуу хамгаалалтын арга хэмжээ, хашаа сэрэмжлүүлэх, тэмдэг, гэрэлтүүлэг зэргийг нэмэгдүүлэх шаардлага байгаа юм.Иймд автозам дээр малаа дайруулсан малчдын буруу болж дээр нь мал дайрсан машины эвдрэлийн өр төлбөрт ордог байдлыг зохицуулах шаардлагатай байгаа юм. Замын хөдөлгөөний дүрэм бодит амьдралд нийцэхгүй байна…Замын хөдөлгөөний дүрэмд өөрчлөлт оруулах саналыг ЗГ-ын хуралдаанаар хэлэлцдэг тул замын хөдөлгөөний дүрмийн холбогдох заалтад өөрчлөлт оруулах саналаа УИХ-ын гишүүн Р.Сэддорж Ерөнхий сайдад 2025 оны 9-р сарын 30-ны өдөр хүргүүлсэн. Улмаар Монгол Улсын Замын хөдөлгөөний дүрэмд өөрчлөлт оруулах асуудлыг Засгийн газрын хуралдаанаар хэлэлцүүлэхээр шийдвэрлэжээ. УИХ-ын гишүүн Р.Сэддорж, “Говь нутгийн мал сүрэг хээрээр бэлчээрлэдэг. Автозам болон төмөр замд малаа дайруулсан малчид малаараа хохироод зогсохгүй, мөргөсөн машины хохирол нэмж барагдуулдаг гаж тогтолцоо, хууль, дүрэм байж болохгүй. Малаа дайруулсан малчид бурууддаг, өр төлбөрт унадаг харгис дүрэм өөрчлөгдөж, нүүдэлчин малчдын талд шийдэгдэнэ гэдэгт итгэж байна” гэв.Нөгөө талаас хөдөө орон нутгийн авто зам тээврийн хэрэгслүүд 80км цагаас дээш хурдтай явах нь түгээмэл байгаа нь мал дайруулах эрсдэлийг нэмэгдүүлж байна. Тиймээс замын хөдөлгөөний дүрэм хурдны хязгаарлалт бодит нөхцөлд нийцэхгүй, малын бэлчээр нүүдлийн онцлогийг тооцох шаардлага ч байгаа юм.