“Өмнөговь U марафон” боловсролын аян хоёр дахь жилдээ амжилттай зохион байгуулагдлаа

УИХ-ын гишүүн Б.Уянгын санаачилгаар ХОЁР дахь жилдээ Өмнөговь U марафон нэртэй боловсролын аяныг аймгийн хэмжээнд ахлах сургуулийн сурагчдад зориулж зохион байгууллаа. Боловсролыг дэмжиж, Эрдэнэс Тавантолгой ХК, Энержи Ресурс - Хөгжлийн Төлөө болон Trigteq ХХК-ийн хамт олон хамтран ажилласан юм.Энэ жилийн оролцогчид өмнөх оныхоос илүү идэвхтэй байлаа. Нийгмийн төсөл бичиж, хэрэгжүүлж, хамгаалахаас гадна сурагчдыг Тогтвортой хөгжлийн зорилтуудаас уур амьсгалын өөрчлөлт, Хариуцлагатай хэрэглээ болон Жендэрийн эрх тэгш байдалтай холбоотой зорилтын хүрээнд эссе бичиж, илтгэл тавиуллаа. Бичих болон илтгэх чадварын сургалтуудыг мэргэжлийн багш нараар оруулсан. Бичиж сурна, бичсэнээ бүгдэд ойлгомжтой илтгэж сурах нь сурагчдын ирээдүйд хэрэг болох юм. Монголын маань ирээдүй тод гэрэлтэж байна. НЭГ сарын хугацаанд, ахлах ангийн сурагчид гидропоник технологиор байцаа тарьж, хог хаягдлыг ангилан ялгаж, хариуцлагатай хэрэглээ болон жендэрийн хэвшмэл ойлголтын тухай бие биедээ, аав ээждээ болон дүү нартаа сургалт орлоо. Хаягдал дугуйгаар тоглоомын талбайн дэвсгэр хийлгэж, хогоо хаянгаа тоглох шийд гаргаж, нарны эрчим хүчийг хурааж утсаа цэнэглэх цэгийг сургуулийнхаа гадаа байгуулж чадлаа. Хариуцлагатай байхын хүрээнд аймгийн төвд явж буй бүх нийтийн тээврийн автобусанд GPS суурилуулж, цахим платформ-д холбосон байлаа. Төрөл бүрийн хаягдлыг дахин сэргээж, хэрэглээнд нэвтрүүлсэн. Хаягдал цаасыг дахин боловсруулж худалдаанд гаргасан байв. Өмсөхөө больсон хуучин хувцсаа сургуульдаа өмсөх улавч эсвэл дахин ашиглах эд зүйлс болгосныг хараад залуучуудаа магтан сайшаав. Шалгаруулалтыг яаж явуулах вэ? Яаж дүгнэх вэ? гэдэг дээрээ хүртэл маргалдахад хүрэв. Эцэст нь онооны хамгийн том жинг баг тус бүрийн сошиал хандалт эзэлсэн. Дүү нараараа их бахархлаа. Аливаа тэмцээн эхлээд дуусдаг, нэг нь түрүүлж, нэг нь удаалдгийг бид мэднэ. Гэхдээ аяны явцад өсөж, бууж байсан үе бүр нь хүүхдүүдийн ирээдүйд нь хэрэг болно гэдэгт итгэлтэй байна.