Ш.Бямбасүрэн: Ард иргэдийнхээ санал хүсэлтийг төрийн бодлогод тусгахын төлөө хичээн, хариуцлагатай ажиллаж байна

Сонгуулийн шинэ тогтолцооны үр дүнд улс төрийн таван нам, эвсэл, салбар салбар, сонирхлын олон бүлгийн өргөн төлөөллөөс бүрдсэн 9 дэх удаагийн Улсын Их Хурал хоёр дахь Намрын чуулганаа он солигдох цаг мөчид өндөрлөсөн билээ. 2025 оны Намрын ээлжит чуулган 2025 оны 09 дүгээр сарын 15-ны өдрөөс 2025 оны 12 дугаар сарын 31-ний өдрийг дуустал ажлын 75 өдөр чуулж,  14 хууль, 37 тогтоол хэлэлцэн баталлаа. Чуулганы нэгдсэн хуралдаан 36 удаа хуралдаж, 148 асуудал, байнгын хорооны хуралдаан 112 удаа хуралдаж, 221 асуудал, дэд хорооны хуралдаан 10 удаа хуралдаж, 18 асуудал, хянан шалгах түр хорооны хуралдаан 13 удаа хуралдаж, 33 асуудлыг тус тус хэлэлцжээ. Өнгөрч буй онд Монголчууд бид шинэ сорилт, шинэ амжилтаар дүүрэн байлаа. Төрд хандах иргэдийн хяналт, оролцоо идэвхжиж, хариуцлагатай ил тод байдлыг сануулж тэр хэрээр УИХ-ын хяналт сайжирсан жил өнгөрч байна. Та бүхнийхээ итгэлийг өвөртлөн төр түших эрхэм үүрэг хүлээсэн Монгол Улсын Их хурлын гишүүний хувьд боловсрол, эрүүл мэнд, нийгмийн салбарын шинэчлэлийг түргэвчлэх, эдийн засгийг тэлэх, төрийн оролцоог хумих чиглэлд ард иргэдийнхээ санал хүсэлт, дуу хоолойг бодлого, шийдвэрт тусгахын төлөө хичээн, хариуцлагатай ажиллаж байна. Ирэх оныг Монгол Улсын Засгийн газраас "Боловсролын жил" болгон зарлалаа. Тэгш хүртээмжтэй, чанартай боловсролын нэгдсэн тогтолцоог бэхжүүлэхээр зорилтот жилийг тодорхойлсон бөгөөд УИХ-ын гишүүний хувиар гүйцэтгэх засаглалын бодлогод хяналт тавьж, иргэд Та бүхнийхээ санал хүсэлт, дуу хоолойг хүргэж ажиллах болно. 2026 онд Дорнод аймагт 124.9 тэрбум төгрөгийн 8 бүтээн байгуулалтын ажил шинээр эхлэхээс тэн хагас нь буюу 4 ажил нь боловсролын салбар дахь бүтээн байгуулалт юм. Сүхбаатар аймагт шинээр 13.4 тэрбум төгрөгийн цэцэрлэгийн барилга, сургуулийн спорт заал, дотуур байрны ажил эхлэх бол Хэнтий аймагт өмнөх жилүүдэд эхэлсэн 27 ажил, хөтөлбөр улсын төсвийн хөрөнгөөр үргэлжлэн хэрэгжинэ. УИХ дахь Ардчилсан намын бүлгээс парламентын хяналтыг бэхжүүлэх, төсвийн сахилга бат, ил тод байдлыг шаардах, хүний эрх, бизнесийн эрх чөлөөг хамгаалах, төрийн хэт оролцоог шүүмжлэх байр суурийг тууштай илэрхийлж ажиллалаа. Ирэх ондоо хариуцлагатай төр, иргэн төвтэй бодлого, чөлөөт зах зээл, шударга өрсөлдөөнийг дэмжсэн эдийн засгийн бодлогыг дэвшүүлж, өндөр ёс зүйтэй ажиллах болно.