Ж.Золжаргал: 10 жилий ойн мэндийг ХҮН намын гишүүд, дэмжигчид, найзууддаа хүргэе!

2015 онд зурагтаар нэг мэдээ хараад санаа нийлэх залуус байна хэмээн улс төрийн клубд очиж билээ. Түүнээс хойш өглөө, оройны уулзалтууд болж, дараа нь нам болж, дараа нь бутарч, дараа нь нийлж, сонгууль болж, жагсаал болж, УИХ-д суудалтай болж, сайдтай болж өдий зэрэгт хүрсэн 10 жилийн мэндийг өнөөдөр ойн баярын хурлаа хийж байгаа ХҮН намын гишүүд, дэмжигчид, найзууддаа хүргэе! Арван жилд олон зүйлс болж өнгөрч. Тогтсон ажил, танил орчноо орхиж улстөрийн идэвхтэн болсон минь энэ намтай холбоотой. Хамгийн сайхан дурсамжууд бол сайн хүмүүс, сайхан найзуудаас үлдсэн байна. Зоригтой, зорилготой олон залуус баг болж нэгдсэн, зарим хөндлөнгөөс дэмжсэн, зарим нь салж явсан, зарим нь үлдсэн байна. Сэтгэлээ чилээж, хүчээ өгсөн та бүхэндээ явсан үлдсэн ялгалгүй бүгдэд нь баярлалаа, бас баяр хүргэе. Сайн муу нийлж сав дүүрдэг. Алдаа оноо нийлж амьдрал болдог. Эцсийн дүндээ бид эх орноо хөгжүүлэх хүсэл дээр л нийлж улс төрийн нам болсон. Энэ зорилго нь хазайлтгүй байж, Монголд хэрэгтэй олон үйлс бүтээхийг та бүхэндээ хүсье!