ОУПХ-ны Хүний эрхийн хороо Хүний эрхийг хамгаалах кампанит ажлыг эхлүүлж буйгаа зарлалаа

Олон Улсын Парламентын Холбооны 152 дугаар Ассамблей энэ сарын 15-19-нд Истанбул хотод болж өнгөрлөө.УИХ-ын гишүүн, Өргөдлийн байнгын хорооны дарга О.Номинчимэг ОУПХ-ны Парламентчдын Хүний эрхийн хорооны ерөнхийлөгчөөр ажиллаж байгаа тул 5 өдрийн турш хуралдаж, 5 улсын парламентын төлөөлөлтэй уулзалт хийж, 17 улстай холбоотой шийдвэр гаргалаа. Тус хорооны хүний эрхийг хамгаалах кампанит ажлыг эхлүүлж байгаагаа зарлаж, улс орнуудын парламент болон парламентч нарт уриалга гаргалаа.Ассамблейн үеэр ДЭМБ болон ОУПХ-ны Эрүүл мэндийн хороо хамтран зохион байгуулсан эрүүл мэндийн татварын талаарх хэлэлцүүлэгт орж, тамхины татварын тухай өөрийн санаачилсан хуулийн төслийн талаар санал солилцох завшаан тохиосон нь онцлох үйл явдал боллоо.Монгол Улс 1962 онд ОУПХ-ны гишүүнээр элссэн цагаасаа хойш идэвхтэй хамтын ажиллагаатай явж ирсэн. Монгол Улсын хувьд энэхүү байгууллагад идэвхтэй хамтын ажиллагаатай байж, дэлхийн парламентуудтай шууд харилцан, ардчилал, хүний эрхийг дэмжигч улс гэдгээ харуулснаар олон улсын тавцанд нэр хүндээ нэмэгдүүлэх нэг алхам гэж үздэг. Энэхүү хариуцлагатай ажлыг хийх нь нэр төрийн хэрэг хэмээн үзэж, хичээн ажиллаж байгаагаа О.Номинчимэг гишүүн онцлов.