Олон жил алдагдалтай ажилласан ТӨК-ыг хувьчлан, төсвийн үр ашиггүй зардлыг бууруулах замаар багш, эмч нарын цалинг нэмэгдүүлэх бүрэн боломжтой!

Багш нарын ажил хаялт үргэлжилсээр байна. Энэ бол зөвхөн цалингийн асуудал биш. Бид улсынхаа ирээдүйг хамгаалах тэмцэлтэй нүүр тулж байна. Өнөөдөр багш, эмч нар өрийн дарамттай, амьжиргаагаа залгуулах гэж тэмцэж байна.  Инфляц, ханшийн хэлбэлзэл өсөж байхад тэдний гар дээр очиж байгаа цалин бодит амьдралд хаанаа ч хүрэхгүй байна. Үр дүнд нь бид хамгийн шаардлагатай, нарийн мэргэжилтэй боловсон хүчин болох багш, эмч нараа гадаад руу алдаж байна. Тэд мэргэжил, мөрөөдлөө хойш тавин, хүний нутагт амьжиргаагаа залгуулах гэж мэргэжлийн бус ажил хийж байна.  Олон жил алдагдалтай ажилласан Төрийн өмчит компаниудыг хувьчлан, төсвийн үр ашиггүй зардлыг бууруулах замаар багш, эмч нарын цалинг бодит түвшинд нэмэгдүүлэх бүрэн боломжтой. Үүнийг бид улсынхаа ирээдүйд хийж буй томоохон хөрөнгө оруулалт гэж харах ёстой.Удааширсан шийдвэр бүр хүүхдийн боловсролын хоцрогдлыг нэмэгдүүлж, тэдний ирээдүйг эрсдэлд оруулж байна. Хүүхдүүд хохирч болохгүй. Тиймээс Засгийн газар нэн даруй бодитой, шийдэмгий арга хэмжээ авах ёстой.