Д.Батлут: “Монгол цэргийн өдөр”-ийн гал халуун мэндийг өргөн дэвшүүлье!

Эрхэм хүндэт Монгол Улсын иргэд ээ!Эх орныхоо амар амгалан байдлын манаанд зогсоо генерал, офицер, ахлагч, байлдагчид аа!Энхийг сахиулах ариун үйлсэд Монгол Улсын нэрийг өндөрт өргөж яваа баатарлаг дайчид аа!Бэлтгэл болон чөлөөнд байгаа ахмад зүтгэлтнүүд ээ!Та бүхэндээ Монгол Улсад орчин цагийн Зэвсэгт хүчин үүсэн байгуулагдсаны түүхт 105 жилийн ой, монгол хүн бүрийн омогшил, үндэсний бахархал, эх оронч үзлийн баяр “Монгол цэргийн өдөр”-ийн гал халуун мэндийг өргөн дэвшүүлье!Монгол цэргийн түүх бол Монгол төр оршин тогтнохын язгуур үндэс, тусгаар тогтнолын бат найдвартай багана билээ. Хүннүгийн морьт харваачдаас эхлэлтэй, Их Эзэн Чингис хааны дэлхийг зассан их цэрэг, Ардын хувьсгалын партизанууд, Халхын гол, Чөлөөлөх дайны баатруудын дайчин уламжлал өнөөдөр бидний мөрдөс дээр гялалзаж байна. Бид түүхээрээ бахархаад зогсохгүй, өвөг дээдсийнхээ эв нэгдэл, тэсвэр хатуужлыг өвлөн тээж, үндэсний дархлаагаа хамгаалах эрхэм үүрэг хүлээсэн хүмүүс юм.Эрхэм иргэд ээ,Монгол цэрэг гэдэг ганцхан тангараг өргөсөн дайчдын нэр биш, ард олныхоо амгалан амьдралын баталгаа, улс орны хөгжил цэцэглэлтийн тулгуур хүч билээ. Манай Зэвсэгт хүчин улс орны стратегийн бүтээн байгуулалт болох төмөр зам, авто замын төслүүдийг гардан гүйцэтгэж, энх цагийн бүтээн байгуулагч гэдгээ бодит ажил хэргээрээ нотолж байна. Байгалийн гамшиг, зуд, үер усны аюул нүүрлэх бүрт манай дайчид иргэдийнхээ амь нас, эд хөрөнгийг авран хамгаалахаар тэргүүн эгнээнд хүчин зүтгэж ирсэн. Иймээс "Иргэн-цэргийн харилцаа" бол манай үндэсний аюулгүй байдлын салшгүй хэсэг мөн.Өнөө цагт дэлхий ертөнц геополитикийн тогтворгүй нөхцөл байдал, технологийн үсрэнгүй хөгжил, цахим орчны шинэ төрлийн заналхийлэл дунд байна. Энэхүү эгзэгтэй үед бид аливаа сорилтыг урьдчилан харж, “ухаалаг” бэлэн байдлыг хангахыг чухалчилж байна. Зөвхөн бие бялдрын чадавхаас гадна мэдээлэл технологи, хиймэл оюун ухаан, инженерчлэлийн өндөр мэдлэгээр зэвсэглэсэн "Орчин үеийн цэрэг"-ийг бэлтгэж, үндэсний сөрөн тэсвэрлэх чадвараа бэхжүүлж байна.Дэлхийн халуун цэгүүдэд үүрэг гүйцэтгэж буй энхийг сахиулагчид маань Монгол Улсын "зөөлөн хүчний бодлого"-ын гол баталгаа болж, эх орныхоо нэр хүндийг дэлхийн тавцанд тамгалсаар ирлээ.Батлан хамгаалах салбарын баримтлах гол шугам бол "Хүн төвтэй" бодлого юм. Үүний хүрээнд бид 2026 оныг “Хүн төвтэй хөгжил- Шинэчлэлтийн жил” болгон зарлаж, цэргийн алба хаагчдын нийгмийн баталгааг хангах, орон сууцжуулах, алба хаах орчин нөхцөлийг сайжруулах чиглэлээр үе шаттай шинэчлэлүүдийг хийж байна. Бид зэвсэг техникээ шинэчлэхийн зэрэгцээ цэргийн албаны үнэ цэнийг өсгөх замаар залуу үедээ эх оронч үзэл, сахилга бат, хариуцлагын дархлаа тогтоохыг зорин ажиллах болно.Эрхэм дайчид аа, ард иргэд ээ!Эх орныхоо төлөө өргөсөн тангарагтаа үнэнч байж, тусгаар тогтнол, бүрэн эрхт байдлыг маань нүдний цөцгий мэт хамгаалж яваа та бүхнээрээ бахархаж байна. Эх орноо хамгаалах үйлс бол дан ганц Батлан хамгаалах салбарын ажил биш, монгол хүн бүрийн зүрх сэтгэлийн дуудлага, эрхэм нандин үүрэг билээ.Монгол цэргийн сүлд хийморь үеийн үед мандан бадарч, төрийн алтан соёмбот далбаа маань энхийн тэнгэрт үүрд намирах болтугай!МОНГОЛ УЛСЫН ИХ ХУРЛЫН ГИШҮҮН, ЗАСГИЙН ГАЗРЫН ГИШҮҮН,БАТЛАН ХАМГААЛАХЫН САЙД Д.БАТЛУТ