УИХ-ын чуулганы /2025.09.17/-ны өдрийн хуралдаанаар Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцлээ.
Хэлэлцэж буй асуудалтай холбогдуулан гишүүд асуулт асуулаа.
УИХ-ын гишүүн Х.Жангабыл:
Монгол Улсын нэгдсэн төсвийн талаар асуулт асууна. Сангийн сайдаас, Баянөлгий аймагт орон нутгийн төсөвт олгох санхүүгийн дэмжлэг, дээрээс нь орон нутгийн хөгжлийн санд олгох санхүүжилтийг 2025 оны төсвийн тодотголоор хасагдсан. Дээрээс нь энэ жилийн 2026 оны төсвөөс бас хасагдсан байна. Өөрөөр хэлбэл орон нутгийн төсөвт олгох санхүүжилтийн дэмжлэг 2 удаа дараалан хасагдсанаас болж Баянөлгий аймагт 164 албан хаагч цомхотголд орохоор байна. Яагаад орон нутгийн төсөвт олгох санхүүгийн дэмжлэгийг хасаад байдаг юм бэ. Миний бодлоор тодорхой шалгууртай байх ёстой. Төвийн бүсээс алслагдсан байдал, дээрээс нь хүн амын тоо, газар нутгийн хэмжээ гэх мэт. Баянөлгий аймаг хүн амын тоогоор хамгийн их, төвийн бүсээс алслагдсан. Дээрх төсвийг албаар хасчихсан юм биш үү. Тодорхой тайлбар авмаар байна.
Боловсролын сайдаас,Монгол Улсын ЗГ энэ жил боловсролыг дэмжих жил болгон зарласан. Ерөнхий сайд хүний хөгжил бол манай ЗГ-ын хамгийн том мега төсөл гэж зарлачихсан. Боловсролын хөрөнгө оруулалт энэ жил 2 дахин нэмэгдсэн. Гэтэл Баянөлгий аймгийн боловсролын салбарт шинээр нэг ч төгрөг хөрөнгө оруулалт тавигдаагүй. Хоёрдугаарт Баянөлгий аймгийн Боловсролын газрын даргаар төрийн албан шаардлагыг хангаагүй, намын нэг нөхрийг та томилуулан ажиллуулж байгаа. Энэ нөхөр цэцэрлэг, сургуулийн захирал, эрхлэгч нарыг Хүн намын гишүүнчлэлийг ав, хүн намын гишүүнчлэлийг авахгүй бол одоо ажлаас чөлөөл гэж дарамталдаг.
Төрийн албаны зөвлөлөөс энэ нөхрийг шалгаад ямар ч одоо шалгуур хангахгүй гэсэн дүгнэлт гарсан. Та үүнийг хэрэгжүүлэхгүй байгаа. тэр нөхрийг хэд хоногийн өмнө тушаал гаргаад ажлаас нь чөлөөлөөд, буцаад томилсон сурагтай. Энэ үнэн юм уу? Энэ үнэн бол ер нь та Хүн намын Хүний нөөцийн сайд юм уу. Монгол Улсын сайд юм уу. Та бол ер нь хуулиа хэрэгжүүлэх хэрэгтэй.