ФОТО: Дархан-Уул аймагт “Өөрчилье, бүтээе” үндэсний хөдөлгөөнийг албан ёсоор нээлээ

Дархан-Уул аймгийн Ардчилсан намын “Өөрчилье, бүтээе” үндэсний хөдөлгөөний нээлт өнөөдөр (2026.09.26) албан ёсоор боллоо.

Хөдөлгөөний нээлтэд 2027 оны Ерөнхийлөгчийн сонгуульд нэр дэвших хүсэлтээ илэрхийлсэн УИХ-ын гишүүн, Монгол Улсын 27 дахь Ерөнхий сайд асан Н.Алтанхуяг, УИХ-ын гишүүн Лу.Гантөмөр, Д.Ганбат нараас гадна Ардчилсан намын дарга, УИХ дахь АН-ын бүлгийн дарга О.Цогтгэрэл, УИХ-ын гишүүн, Дархан-Уул аймгийн Ардчилсан намын дарга С.Эрдэнэболд, УИХ-ын дэд дарга Б.Пүрэвдорж, УИХ-ын гишүүн Ж.Батсуурь, Ө.Шижир тэргүүтэй зочид, төлөөлөгчид оролцов.

Үндэсний хөдөлгөөнийг нээж, Ардчилсан намын дарга, УИХ дахь АН-ын бүлгийн дарга О.Цогтгэрэл хэлсэн үгэндээ ““Ардчилсан нам “Монголоо өөрчилье, Монголдоо бүтээе” гэсэн үзэл санааг үндэсний хөдөлгөөн болгон өрнүүлж байна. Яагаад Монголоо өөрчлөх шаардлагатай болсон бэ? Яагаад Монголдоо бүтээх шаардлагатай болсон бэ гэдэг асуулт гарна. 36 жилийн ардчилал, ардчилсан улс төрийн тогтолцоо, чөлөөт эдийн засгийн “машин” маань энэ хүрээд гацсан.

Авлига, хээл хахууль, бүтээдэггүй эдийн засаг, халамжийн төр зэрэг өнөөдрийн тулгамдсан олон асуудал биднээс өөрчлөлтийг шаардаж байна. Энэ өөрчлөлтийн зүг чиг нь Монголдоо бүтээдэг, үйлдвэрлэдэг болж, Монгол хүний оюун бодол шингэдэг болохыг эргэлзээгүй зааж байна. Тиймээс Ардчилсан нам улс орноо өөрчлөлтийн зүг чигт манлайлж, дотоод зохион байгуулалтаа сэргээж, ирэх сонгуулиудад бэлтгэх ёстой. Үүнээс гадна Ардчилсан нам засаглаж, улс орноо хөгжүүлэх мөрөөдөл, амбицтай улс төрийн хүчин. Тиймээс засаглахын төлөө, хөгжлийн төлөөх бодлогыг энэхүү хөдөлгөөний хүрээнд бид боловсруулна” хэмээн онцоллоо.

УИХ-ын гишүүн, Дархан-Уул аймгийн С.Эрдэнэболд “Өөрчилье, бүтээе” үндэсний хөдөлгөөний хүрээнд та бүхэнтэй уулзаж байгаа шалтгаан нь ажилтай, орлоготой Дарханыг яаж бүтээх вэ? Авлига, алагчлалгүй Дарханыг яаж бүтээх вэ? Эрүүл боловсролтой Дарханыг яаж бүтээх вэ? Аюулгүй, эко Дарханыг яаж бүтээх вэ гэсэн асуултын хүрээнд өнөөдөр хэлэлцүүлгүүд хийж байна. Хэлэлцүүлгийн хүрээнд Дархан хот, Шарын гол, Орхон, Хонгор суманд байгаа өрх бүрт очиж хэлэлцүүлгийг үргэлжлүүлнэ. Ардчилсан нам ард иргэдийнхээ саналыг сонсож, амьдралд нь тулгамдаж байгаа зовлон жаргалыг шийдвэрлэдэг улс төрийн институт хүчин байж, ялалт байгуулж зөв бодлогыг Монголд хэрэгжүүлэхийн төлөө өнөөдөр өөрчлөх шаардлагатай зүйлсийг ард түмэнтэйгээ хамт тодорхойлно. Монголд ус агаар мэт дутагдаж байгаа ардчиллыг сэргээхийн төлөө шударга ёсыг сахиулах, эдийн засгийн өсөлтийг бий болгох, иргэдэд эрх, эрх чөлөөг эдлүүлэхийн төлөө энэхүү хөдөлгөөнийг өрнүүлж байна” хэмээв.

Дархан-Уул аймагт өрнөж буй үндэсний хөдөлгөөний хүрээнд өнөөдөр “Ажилтай, орлоготой Дархан”, “Авлига, алагчлалгүй Дархан”, “Аюулгүй, эко Дархан”, “Эрүүл, боловсролтой Дархан” гэсэн дөрвөн дэд сэдвийн хүрээнд хэлэлцүүлэг зохион байгууллаа.