Монгол Улсын шинжлэх ухаан, технологийн тогтолцоог бэхжүүлэх хамтын ажиллагаа өргөжсөөр байна

БНСУ-ын Сөүл хотноо Монголын Шинжлэх Ухааны Академийн Их Сургууль (UMAS) болон БНСУ-ын Шинжлэх ухаан, технологийн үнэлгээ, төлөвлөлтийн хүрээлэн (KISTEP)-гийн удирдлагын түвшний уулзалтад оролцож, Монгол Улсын шинжлэх ухаан, технологийн салбарын үнэлгээ, эрх зүйн орчныг боловсронгуй болгоход хамтран ажиллах саналаа илэрхийллээ.

KISTEP (Korea Institute of S&T Evaluation and Planning) нь БНСУ-ын шинжлэх ухаан, технологи, инновацын бодлого, стратегийн төлөвлөлт, улсын судалгаа хөгжүүлэлтийн (R&D) төсвийн хуваарилалт, зохицуулалт, R&D хөтөлбөрийн үнэлгээ, технологийн ирээдүйн төлөв болон олон улсын шинжлэх ухаан, технологийн хамтын ажиллагааны чиглэлээр үйл ажиллагаа явуулдаг байгууллага юм.

Уулзалтаар Монгол Улсын шинжлэх ухаан, технологи, инновацын тогтолцоог бэхжүүлэх, R&D бодлого, төлөвлөлт, санхүүжилт, үнэлгээний механизмыг боловсронгуй болгох, судалгаа хөгжүүлэлтийн менежментийн чиглэлээр хүний нөөцийг бэлтгэх асуудлаар санал солилцож, KISTEP-ийн БНСУ-ын үндэсний R&D тогтолцоог хөгжүүлсэн туршлага Монгол Улсад чухал ач холбогдолтойг онцоллоо.