О.Саранчулуун: Эмэгтэй улс төрчдийг гадаад төрх, гэр бүл, зан төлвөөр нь бус мэдлэг, бодлогын шийдэл, ажлаар нь дүгнэе!

Улаанбаатар хотноо 2026 оны 10 дугаар сарын 12–13-ны өдрүүдэд зохион байгуулагдаж буй “Төлөөллөөс шийдвэр гаргах түвшний нөлөөлөл рүү” сэдэвт Дэлхийн эмэгтэй парламентчдын форумын хүрээнд “Эмэгтэй улс төрчид, парламентын гишүүдийн талаарх нийгмийн хэвшмэл ойлголт, түүнээс үүдэх сорилт, шийдвэрлэх арга зам” сэдэвт хэлэлцүүлэгт УИХ-ын гишүүн О.Саранчулуун панелистаар оролцлоо.

Хэлэлцүүлгийн үеэр эмэгтэй улс төрчдийг мэдлэг, бодлогын шийдэл, ажлын үр дүнгээр нь бус, гадаад төрх, гэр бүлийн байдал, зан төлөв, сэтгэл хөдлөлөөр нь дүгнэх хэвшмэл ойлголтыг өөрчлөх шаардлагатайг онцоллоо. Мөн эмэгтэйчүүдийн улс төрийн оролцоог зөвхөн парламент дахь суудлын тоогоор бус, тэдний дуу хоолой бодит шийдвэр, бодлогод хэрхэн тусаж байгаагаар үнэлэх нь чухал гэдгийг илэрхийллээ.

Түүнчлэн хөгжлийн бэрхшээлтэй эмэгтэйчүүдийн улс төрийн оролцоонд тулгарч буй давхар саад бэрхшээл, мэдээлэл, орчин, үйлчилгээний хүртээмжийн асуудлыг хөндөж, хүн бүрийн тэгш оролцоог хангахын тулд хэвшмэл ойлголтоос гадна тогтолцооны саадыг арилгах шаардлагатай талаар байр сууриа хуваалцлаа.

Хэлэлцүүлгийг Туркийн парламентын гишүүн, Олон улсын парламентын холбооны (IPU) Эмэгтэй парламентчдын товчооны дэд ерөнхийлөгч Фатма Өнжү удирдан явуулж, Уганда, Польш, БНСУ болон Монгол Улсын төлөөлөгчид туршлага, санал солилцов.

Эмэгтэйчүүдийн оролцоо зөвхөн төлөөллөөр хязгаарлагдах бус, бодит шийдвэрт нөлөөлөх боломж болон өргөжих ёстой.