"Төвийн болон хойд бүсийн нөөц, боломж, хамтын ажиллагааг ЭЗ-ийн бодит өсөлт болгох нь" хэлэлцүүлэг болов

УИХ-ын гишүүн Б.Бат-Эрдэнэ "Төвийн болон хойд бүсийн нөөц, боломж, хамтын ажиллагааг ЭЗ-ийн бодит өсөлт болгох нь" хэлэлцүүлэгт оролцож, дараах мэдээллийг хуваалцан, байр сууриа илэрхийлэв. 

Монгол Улсын бүсчилсэн хөгжлийн бодлого цаашид зөвхөн аймаг, орон нутгийн хөгжлийн асуудал биш, харин үндэсний эдийн засгийн бүтцийг төрөлжүүлэх, үйлдвэрлэлийн бүтээмжийг нэмэгдүүлэх, орон нутгийн өрсөлдөх чадварыг сайжруулах үндсэн механизм болох шаардлагатай.

Бүсчилсэн хөгжил гэдэг нь аймаг бүрийг тус тусад нь хөгжүүлэх тухай ойлголт биш. Харин бүс нутгуудын давуу талыг харилцан уялдуулж, үндэсний хэмжээнд эдийн засгийн шинэ боломж, нэмүү өртөг, ажлын байр бий болгох бодлого юм.

Төвийн болон Хойд бүсийн хамтын ажиллагаа нь зөвхөн уулзалт, хэлэлцүүлгийн түвшинд үлдэх бус, бодит төсөл, хөрөнгө оруулалт, үйлдвэрлэл, ажлын байр болон хэрэгжих учиртай.

Тиймээс бид цаашид:

• Нөөцөө тодорхойлдог бус, нөөцөө эдийн засгийн эргэлтэд оруулдаг;

• Боломжоо ярьдаг бус, боломжоо хөрөнгө оруулалт болгодог;

• Хамтын ажиллагааг тунхагладаг бус, хамтын үр дүнг хэмждэг бүсчилсэн хөгжлийн бодлогод шилжих шаардлагатай байна.