"Нутагтаа эзэн 100:1000" төсөлд хамрагдсан малчид анхны ургацаа хурааж байна

“Нутагтаа эзэн 100:1000” төсөлд хамрагдсан Булган аймгийн Гурванбулаг сумын Бэрх, Авзага, Хөвнө багийн 13 малчин өрх 100 га талбайд энэ жил анхлан малын тэжээл тариалан, ургац хураалтын ажил ид явагдаж байна. Төсөлд хамрагдсан 13 өрх нэгдэж ногоон тэжээл тарих, хураах, боох төхөөрөмж бүхий трактор авах санхүүжилт босгож техникийн асуудлаа шийдвэрлэн ургацаа хурааж байгаа нь жишиг туршлага болж байна.

Мөн хавар тариалалт эхлүүлэхэд сум болон аймгийн тамгын газраас нийт 35 сая төгрөгийн санхүүжилтээр малчдыг дэмжин ажиллажээ. Уг төсөл хэрэгжиж буй 17 аймгаас Булган аймаг нь төслийг амжилттай хэрэгжүүлэхэд малчид, сум, аймаг тун сайн хамтарч ажилласнаараа онцлогтой байв. Үүний үр дүнд малчид сэтгэл хангалуун хур бороо харьцангуй бага байсан хэдий ч ургацын хэмжээ боломжийн хэмээн намрын нартай уралдан ургацын талбайд ажил ундарч, хөдөлмөрийн үр шимээ боодол, боодол өвсөөр тооцоолон хурааж байна.

Сум орон нутагтаа байгалийн хадлан тэжээл бэлтгэх боломжгүй, малын тэжээл бэлтгэлд өндөр зардал гаргаж ирсэн Гурванбулаг сумын иргэд, сумын удирдлагын зүгээс өөрсдийн нутагт малын тэжээл тариалж, хэрэгцээт тэжээлийн нөөцөө бүрдүүлэх боломжтой болсон нь бодит үр өгөөжтэй , цагаа олсон, малчдын тулгамдсан асуудлыг шийдсэн “Нутагтаа эзэн 100:1000” төслийг санаачлан хэрэгжүүлж буй Хүнс, хөдөө аж ахуй, хөнгөн үйлдвэрийн сайд Ц.Идэрбат болон холбогдох хүмүүст талархал илэрхийлж байлаа.