Шим тэжээлтэй, чанартай хоол идэх тогтолцоо нь "Эрүүл" сургуулийн бодлого мөн

Өнөөдөр /2026.10.16/ дэлхийн хүнсний өдөр тохиож байна. Энэ өдрийг тохиолдуулан БНСУ-ын Олон улсын хамтын ажиллагааны байгууллага (КОЙКА)-ийн Монгол дахь Суурин төлөөлөгч Жу Хэйн Нантай уулзаж, боловсролын салбарын хоол үйлдвэрлэлд хэрэгжиж байгаа 8 сая ам.долларын буцалтгүй тусламжийн төслийн явц болон цаашдын хамтын ажиллагааны талаар санал солилцлоо. 

Сургууль, цэцэрлэгийн хоол үйлдвэрлэл гэдэг зөвхөн хүүхдийг хооллох төдий зүйл биш, манай ирээдүйн эрүүл мэнд, боловсролын чанартай шууд холбоотой суурь асуудал юм.

Монгол улс сургууль, цэцэрлэгийн хоол үйлдвэрлэлийн тогтолцоог бүтнээр нь бий болгохыг зорин ажиллаж байна.

Энэ хүрээнд  сум, аймаг, дүүрэг, нийслэлийн онцлогт тохирсон хоол үйлдвэрлэлийн 3 өөр загварыг хэрэгжүүлнэ.

Мөн төслийн хүрээнд ашиглалтад орж, маш үр дүнтэй ажиллаж байгаа ШУТИС-ийн "Хүүхдийн хоол шим тэжээл, сургалт арга зүйн үндэсний төв"-өөр дамжуулан мэргэжлийн экспертүүдийг ажиллуулах хүсэлт тавилаа.

UNESCO-ийн чуулганд оролцох үеэрээ  олон улсын тавцанд "School Meals Coalition" буюу Дэлхийн сургуулийн хоолны эвсэлд Монгол улс албан ёсоор гишүүнээр нэгдэж, нэрээ баталгаажуулсан.

КОЙКА-ийн төслийн хүрээнд 10 сургууль болон ШУТИС-ийн сургалтын төвд засвар, тоног төхөөрөмж нийлүүлэхээс:  2025 онд 3 сургууль, ШУТИС-ийн төвийн их засвар бүрэн дууссан.

2026 онд 4 сургуулийн ажил үргэлжлэн хийгдэж байна. Бид төслийн явцтай биечлэн танилцаж, өмнө тулгарсан зарим зохицуулалтын асуудлуудыг шат дараатай шийдвэрлэж, төслийн ажлыг  эрчимжүүлэхээр зорьж байна.