435 мянган ахмадын дундаж тэтгэвэр 1,188,800 төгрөг боллоо

Монгол Улсын 2026 оны төсвийн тухай хуульд өөрчлөлт оруулах тухай,  хамт болон дагалдуулан өргөн мэдүүлсэн хууль, тогтоомжийн төслүүд эцэслэн батлагдлаа.

2026 оны төсвийн тодотголоор иргэдийн орлогыг дэмжих, стратегийн нөөц бүтээгдэхүүний хангамжийг нэмэгдүүлэх арга хэмжээг авч хэрэгжүүлнэ.

• Боловсрол, эрүүл мэндийн салбарын ойлгомжгүй “хоёр цалин”-гаас чөлөөлж, нэмэгдсэн цалингаас нэмэгдэл цалинг тооцон олгоно. Мөн төрийн үйлчилгээний 24 мянган албан хаагчдын цалинг 2026 оны 11 дүгээр сарын 01-нээс 50 хүртэлх хувиар нэмэгдүүлнэ.
• Нийгмийн даатгалын хуулийн хэрэгжилтийн хугацааг наашлуулж, 2026 оны 11 дүгээр сарын 01-нээс эхлэн ахмадуудад суурь тэтгэврийг олгож эхэлнэ. Ингэснээр 435 мянган ахмадын дундаж тэтгэвэр 1,188,800 төгрөг болж байна.
• Боловсролын чанарыг тэгш, хүртээмжтэй болгох үүднээс суралцагчдын сурах орчин нөхцөлийг сайжруулах, ачаалал өндөртэй байршлуудад сургуулийн зориулалттай барилга түрээслэх, шаардлагатай тоног төхөөрөмжөөр хангахад дэмжлэг үзүүлнэ.
• Хүнсний өргөн хэрэглээний бараа бүтээгдэхүүн болох улаан буудай, хүнсний ногоо, махны нөөцийг бүрдүүлэхэд дэмжлэг үзүүлэн, түлш шатахууны үнийн өсөлтийг хязгаарлах, нөөцийг бүрдүүлнэ.
• Айл өрхүүдэд санхүүгийн дарамт үүсгэхгүй  байх үүднээс эрчим хүчний үнийн тарифийг нэмэгдүүлэхгүй, импортын цахилгааны үнийн өсөлтөд улсаас татаас олгоно. Мөн дулааны цахилгаан станцуудад их засвар, тоног төхөөрөмжийн шинэчлэлийг хийж, цахилгаан хангамжийг тогтворжуулна.