Монгол-Индонез улсын Эрүүл мэндийн салбарт хамтран ажиллах Санамж бичигт гарын үсэг зурлаа

Монгол Улсын Эрүүл мэндийн сайд Э.Батшугар ДЭМБ-ын Номхон далайн баруун бүсийн хорооны 77 дугаар чуулганы үеэр Бүгд Найрамдах Индонез Улсын Эрүүл мэндийн сайд Буди Гунади Садикинтэй уулзаж, хоёр улсын эрүүл мэндийн салбарын хамтын ажиллагааг өргөжүүлэх талаар санал солилцлоо.

Уулзалтын үеэр Монгол Улсын Эрүүл мэндийн яам, Бүгд Найрамдах Индонез Улсын Эрүүл мэндийн яам хоорондын эрүүл мэндийн салбарт хамтран ажиллах тухай харилцан ойлголцлын санамж бичигт гарын үсэг зурж, хамтын ажиллагаагаа албан ёсоор баталгаажууллаа.

Санамж бичгийн хүрээнд:

• Эм, вакцины зохицуулалтын тогтолцоог бэхжүүлэх;

• Цахим эрүүл мэндийг хөгжүүлэх;

• Хоёр улсын мэргэжлийн байгууллагуудын техникийн хамтын ажиллагааг өргөжүүлэх;

• Туршлага, мэдлэг, мэдээлэл солилцох;

• мэргэжлийн баг, төлөөлөгчдийн харилцан айлчлал, хамтарсан үйл ажиллагааг дэмжих чиглэлээр хамтран ажиллана.

Индонез Улсын Хүнс, эмийн хяналтын агентлаг 2025 онд вакцины зохицуулалтын чиглэлээр ДЭМБ-аас хүлээн зөвшөөрөгдсөн жагсаалтад багтсан нь тус улсын чухал амжилт юм. Энэ чиглэлээр Индонезийн туршлагаас суралцаж, холбогдох байгууллагуудын техникийн хамтын ажиллагааг хөгжүүлэх сонирхлоо илэрхийллээ.

Мөн Индонез Улсын Үндэсний эрүүл мэндийн мэдээлэл солилцооны платформыг хөгжүүлсэн туршлагыг судалж, цахим эрүүл мэндийн чиглэлээр хамтран ажиллах талаар санал солилцов.

Индонезийн тал цахим эрүүл мэнд, эм, вакцины зохицуулалтын чиглэлээр хамтран ажиллаж, Монголын мэргэжлийн багийг ойрын хугацаанд урьж, туршлагаа хуваалцахад бэлэн байгаагаа илэрхийллээ.

Энэхүү санамж бичиг нь Монгол, Индонез Улсын эрүүл мэндийн салбарын хамтын ажиллагааг шинэ шатанд гаргаж, эм, вакцины зохицуулалт болон цахим эрүүл мэндийн хөгжлийг дэмжих чухал ач холбогдолтой юм