Шилжилт хөдөлгөөнийг хязгаарлахын тулд малжуулах хөтөлбөр хэрэгжүүлэх санал хэлэв

Өнөөдрийн /2026.10.20/ хоёр дахь уулзалт Галшар суманд боллоо. УИХ-ын гишүүн М.Ганхүлэгийн хамт сумын иргэд, төрийн албан хаагчдын төлөөлөлд 2026 оны төсвийн тодотголын онцлог, ХХААХҮ-ийн салбарын бодлого, шийдвэрийн талаар танилцуулж, иргэдийн саналыг сонслоо.

Галшар сумын иргэд 2023 оны өвөл, 2024 оны хаварт тохиосон төмөр зудны улмаас мал сүргийнхээ үлэмж хэсгийг алдаж, малгүй болсон өрхүүд шилжих хөдөлгөөн хийх нь ихэссэнийг хэлж байна. Үүнтэй холбогдуулан иргэдийг малжуулах хөтөлбөрт хамруулах, Галшарын малын махны гойд амтыг түшиглэн брэнд бүтээгдэхүүн үүсгэж, махны үйлдвэрлэлийг хөгжүүлэх боломж, түүнчлэн боловсролын хүртээмжийн асуудлаар асуулт, асууж санал хэллээ.

Тус сумаас аймгийн ИТХ-ын төлөөлөгчөөр сонгогдсон Б.Түмэнбаяр Галшар сумын Оч багт үүрэн холбооны сүлжээ нэвтрүүлэхэд дэмжлэг үзүүлэхийг хүслээ. Оч баг Чингис хотоос 90 км зайтай, 164.7 мянган га газар, 348 хүн амтай, 148 малчин өрхтэй бөгөөд үүрэн холбооны сүлжээ нэвтрээгүй бүс гэдгийг тодотгов. Түүнчлэн багийн иргэд, малчид үүрэн холбооны сүлжээгүйгээс мэдээлэл, холбооны үйлчилгээ хүртэх боломж хязгаарлагдмал, малчдын өдөр тутмын амьдрал, аюулгүй байдал хөндөгдөж, яаралтай тусламж авах нөхцөлд хүндрэл учруулж байгааг тэрбээр мэдээллээ.

Тиймээс Зүүн бүсээс сонгогдсон УИХ-ын гишүүд анхаарч, судалж шийдвэрлэхээ илэрхийлэв.

Галшар сумын ерөнхий боловсролын сургуулийн 160 хүүхдийн суудалтай барилгын өргөтгөлийн ажил үргэлжилж байгаа. Уг өргөтгөлийн барилгын ажлыг улсын төсвийн 3.8 тэрбум төгрөгийн хөрөнгө оруулалтаар “Молор констракшн” ХХК гүйцэтгэж байгаа бөгөөд ирэх онд ашиглалтад орох юм