Баянхутаг сумаас "Нутагтаа эзэн 100:1000" төсөлд малчин өрх бүр 300 гаруй боодол тэжээл авчээ

Эргэх холбоо уулзалтын хүрээнд УИХ-ын гишүүн, ХХААХҮ-ийн сайд Ц.Идэрбат УИХ-ын гишүүн М.Ганхүлэгийн хамт өнөөдөр Хэнтий аймгийн Баянхутаг суманд ажиллаж байна.

Өнгөрсөн зун Хэнтий аймгийн Баянхутаг сумын 25 малчин өрх нэгдэн “Нутагтаа эзэн-100:1000” төслийн хүрээнд “Улаан Өндөр” багийн нутаг дахь атаршсан талбайг сэргээн ашиглаж, 100 га талбайд тэжээлийн таримал тариалсан.

Тэгвэл малчид ногоон тэжээлээ хураан авсан. Өрх бүрт 335 боодол тэжээл хуваарилагдсан бөгөөд тэжээлийнхээ дээжээс сумынхаа нөөцөд 95 боодол өвс хандивлажээ. Төсөлд хамрагдсан өрхүүд мөн өөрийн тэжээлээс нутгийнхаа малчдад 100 хүртэлх боодлыг зах зээлийн үнээс хямд үнээр борлуулна гэв. Түүнчлэн сумын хэрэгцээнд мөн 100 га газар авч, ирэх жил нийтдээ 200 га газар ногоон тэжээл тариалахаар төлөвлөжээ.

Баянхутаг сумын иргэд ХХААХҮ-ийн салбарт олгогдож буй урамшуулал, малын хулгай, малын вакцинжуулалт, тус сумын Буян уулын уурхайн лицензийн асуудлыг анхаарч үзэх асуудлыг дэвшүүлэв.

Мөн сургуулийн дотуур байр удаашралтай үргэлжилж байгаа, махны экспорт, отрын малчдын шилжилт хөдөлгөөн ихсэж буйг анхаарах, махны үнэ чөлөөлөх, Баянхутаг сумыг авто замаар холбох талаар мөн асуулт асууж, хариулт авлаа.

Манай улс шүлхий, бог малын мялзан, үхрийн арьс товруутах зэрэг малын халдварт өвчнөөс сэргийлэх вакциныг импортоор авахад сүүлийн таван жилд буюу 2021–2025 онд 70 гаруй тэрбум төгрөг зарцуулжээ.

Тиймээс вакцины импортын хамаарлыг бууруулах зорилгоор “Биокомбинат” ТӨХХК-ийг түшиглэн дотооддоо вакцин үйлдвэрлэх тодорхой ажлуудыг сайд болмогцоо эхлүүлээд байна. Тухайлбал, бог малын мялзан өвчнөөс сэргийлэх вакциныг дотоодод шинээр үйлдвэрлэх, шүлхийн вакциныг холих, савлах технологийг нутагшуулах ажил идэвхтэй өрнөж байна.

Энэ хүрээнд ХХААХҮЯ-ны дэргэд байгуулагдсан ажлын хэсэг ОХУ, БНХАУ-ын томоохон лабораториудтай хамтран ажиллаж байгаа бөгөөд ирэх 11 дүгээр сард багтаан вакцины эхний тунг гаргах талбайн туршилт хийхээр ажиллаж байна.

Түүнчлэн Ямааны годрон өвчнийн тархалтыг бууруулахтай холбогдуулан яаралтай хариу арга хэмжээний бэлэн байдлыг хангахад шаардлагатай 1,5 сая тун буюу 6000 литр вакциныг дотооддоо үйлдвэрлэхэд нийт 1,5 тэрбум төгрөгийн санхүүжилтийг Засгийн газар шийдвэрлэсэн. Ингэснээр Ямааны годрон өвчнөөс урьдчилан сэргийлэх вакциныг үндэсний үйлдвэр “Биокомбинат” ТӨХХК дотооддоо үйлдвэрлэх ажил эхлээд байна.

Мөн энэ сарын 16-ны өдрөөс Мал Эмнэлгийн Ерөнхий Газрын дарга Х.Алтангэрэлээр ахлуулсан ажлын хэсэг Говь-Алтай аймагт ажиллаж байна.