Сүхбаатар аймгийн ахмад дайчдын гэр бүлд Ерөнхийлөгчийн илгээлтийг хүргэлээ

Батлан хамгаалахын сайд Д.Батлут Монгол Улсын тусгаар тогтнол, эрх чөлөөний төлөөх тэмцлийн түүхэнд нэрээ мөнхөлсөн Их жанжин Д.Сүхбаатарын нэрээр овоглосон Сүхбаатар аймагт эх орныхоо төлөө тулалдаж явсан ахмад дайчдын гэр бүл, үр хүүхдэд Монгол Улсын Ерөнхийлөгчийн илгээлтийг хүргэлээ.

Тус илгээлт нь 1945 оны Чөлөөлөх дайнд оролцож явсан ахмад дайчдын түүхэн гавьяаг архивын баримтаар сэргээн баталгаажуулж, дайнд оролцсоныг гэрчлэх баримт бичиг, 80 жилийн ойд зориулан гаргасан “Бид ялав” медалиас бүрдэж байна.  Ингэснээр эцэг өвгөдийн байгуулсан бахархлын медаль үр хүүхдэд нь өвлөгдөн хадгалагдаж, хос медалийн эзэд болж байна.

Түүхэн ой санамжийг хадгалах, эх оронч хүмүүжлийг төлөвшүүлэхэд дэмжлэг үзүүлэн ажилласан Сүхбаатар аймгийн ИТХ-ын дарга Д.Хосбаяр тэргүүтэй аймгийн удирдлага, алба хаагчид, хамт олонд талархал илэрхийлье!

Эх орныхоо төлөө тулалдсан дайчдын гавьяа мартагдах ёсгүй. Тэдний байгуулсан гавьяа, хамгаалж үлдээсэн тусгаар тогтнолын үнэ цэн үеийн үед мөнхөд орших учиртай.