Гишүүд 116-р сургуулийн байр, дотуур байрны төсвийг нэмэгдүүлэх санал гаргажээ

ХХНББХ-ны хуралдаанаар УИХ-ын гишүүн О.Саранчулуун 116-р сургуулийн үйл ажиллагаатай асуудлыг хөндлөө.

УИХ-ын гишүүн О.Саранчулуун:

Яамны мэдээллээр 116 дугаар сургуульд нийт 132 орчим хүүхэд суралцаж байгаагийн 80 орчим хувь нь сул хараатай байна. Тиймээс 5,000 ширхэг брайль сурах бичиг хэвлэх тооцоог ямар хэрэгцээнд үндэслэснийг тодрууллаа.

Мөн 116-р сургуулийн шинэ барилга, дотуур байрыг хэзээ ашиглалтад оруулахыг тодорхой болгохыг шаардлаа. Яамны хариултаар 320 хүүхдийн суудалтай сургуулийн барилгын нийт төсөвт өртөг 5.2 тэрбум төгрөг бөгөөд 2027 оны төсвийн төсөлд 2.1 тэрбум төгрөгийн санхүүжилт тусгажээ. Төсөв батлагдаж, сонгон шалгаруулалт үр дүнтэй явагдвал 2027-2028 оны хичээлийн жилд ашиглалтад оруулах боломжтой гэсэн ч дотуур байрны ашиглалтад орох хугацаанд тодорхой хариулт өгсөнгүй.

Хүүхдийн сурч боловсрох эрхийг “анхаарч ажиллана” гэсэн тайлбараар хангахгүй. Хэрэгцээнд нь нийцсэн сурах бичиг, аюулгүй, хүртээмжтэй сургууль, дотуур байрыг тодорхой хугацаа, санхүүжилттэйгээр шийдвэрлэх шаардлагатай.

Миний бие УИХ-ын гишүүдийн хамтаар 116-р сургуулийн байр, дотуур байрны төсвийг нэмэгдүүлэх санал гаргасан.