Дэлхийн банктай хамтын ажиллагааг өргөжүүлэх чиглэлээр санал солилцов

Монгол Улсын гэр бүл, хөдөлмөр, нийгмийн хамгааллын салбарын бодлого, шинэчлэлийг дэмжих чиглэлээр Дэлхийн банкнаас үзүүлж буй техникийн туслалцаа, судалгаа, шинжилгээ, мэргэжлийн зөвлөгөө, хүний нөөцийн чадавхыг бэхжүүлэхэд чиглэсэн хамтын ажиллагаанд талархал илэрхийлж, Дэлхийн банкны Суурин төлөөлөгч Виктория Делмон, Ази Номхон далайн бүсийн Нийгмийн хамгаалал хариуцсан газрын дарга Камилла Холмемо тэргүүтэй төлөөлөгчдийг хүлээн авч уулзлаа.

Манай салбарын өмнө тэтгэврийн тогтолцооны санхүүгийн тогтвортой байдлыг хангах, хөдөлмөр эрхлэлтийг нэмэгдүүлэх, нийгмийн халамжийн үйлчилгээг оновчтой хүргэх, хүн амын насжилтаас үүдэх урт хугацааны сорилтод бэлтгэх зэрэг чухал асуудал тулгарч байна. Цаашид энэ чиглэлээр хамтран ажиллах, үйл ажиллагаа өргөжүүлэхэд Дэлхийн банкны техникийн туслалцаа, судалгаа, дүн шинжилгээ чухал ач холбогдолтой.

Монгол Улс суурь тэтгэвэр, тэтгэврийн даатгалын сангаас олгох тэтгэвэр, хувийн нэмэлт тэтгэвэр бүхий 3 давхаргат тогтолцоонд шилжих хүрээнд анх удаа тэтгэвэр авагч ахмад настанд суурь тэтгэврийг 2026 оны 11 дүгээр сарын 01-ний өдрөөс олгож эхэлнэ.

Цаашид тэтгэврийн тогтолцооны урт хугацааны санхүүгийн тогтвортой байдлыг хангах, хөдөлмөрийн зах зээлийн мэдээллийн тогтолцоог боловсронгуй болгох, ажиллах хүчний ур чадварыг ажлын байрны эрэлттэй уялдуулах, уур амьсгалын эрсдэлийн үед нийгмийн хамгааллын хариу арга хэмжээг сайжруулах, хүн амын насжилтын цогц дүн шинжилгээнд үндэслэн урт хугацааны бодлогын хувилбар боловсруулах чиглэлээр хамтран ажиллах тухайд харилцан санал солилцлоо.