Ц.Туваан: Мал эмнэлгийн салбарт зарцуулсан 5.3 тэрбум төгрөгийн зарцуулалт, хариуцлагын асуудлыг тодорхой болгоё!

УИХ-ын Байгаль орчин, хүнс хөдөө аж ахуйн байнгын хорооны /2026.10.22/ хуралдаанаар УИХ-ын гишүүн Ц.Туваан дараах асуултыг ХХААХҮ-ийн яаманд тавилаа.

1. Сүүний урамшууллын талаар

Сүүний урамшууллыг гуравдугаар сарын байдлаар олгосон эсэх, мөн ирэх оны төсөвт сүүний урамшууллын санхүүжилтийг нэмэгдүүлэн тусгасан эсэх талаар тодорхой мэдээлэл өгнө үү.

2. Хивэгний экспортын хориг, тэжээлийн үнийн талаар

Монголын малчдын түгээмэл хэрэглэдэг үндсэн тэжээл бол хивэг. Гэвч хивэг экспортод гарснаар дотоодын үнэ өсөж, малчдад хүндрэл учирч байна. Хивэгний экспортод хориг тавих асуудал ямар шатанд явж байгаа, дотоодын хэрэгцээг хангах, үнийг тогтвортой байлгах чиглэлээр ямар зохицуулалт хэрэгжүүлж байгаа талаар мэдээлэл өгнө үү.

3. Мал эмнэлгийн 5.3 тэрбум төгрөгийн асуудлын талаар

Мал эмнэлгийн салбарт зарцуулсан 5.3 тэрбум төгрөгийн асуудлыг нарийвчлан шалгаж, хөрөнгийн зарцуулалт, хариуцлагын асуудлыг тодорхой болгох шаардлагатай байна. Нөхөн төлбөрт зарцуулахаас илүүтэй урьдчилан сэргийлэх вакцин худалдан авч, малын эрүүл мэндийг хамгаалахад ашигласан бол илүү үр өгөөжтэй байх байлаа. Иймд уг асуудлыг хууль хяналтын байгууллагаар нягтлуулж, холбогдох шийдвэр, хариуцлагыг тодорхой болгох талаар анхаарч ажиллана уу.