Ц.Туваан: Шүлхий өвчний тархалтын шалтгаан, нөхцөл байдлыг нарийвчлан судлах шаардлагатай байна!

Байгаль орчин, хүнс хөдөө аж ахуйн байнгын хорооны 2026.10.22 өдрийн хуралдаанаар УИХ-ын гишүүн Ц.Туваан ХХААХҮЯ-наас дараах асуудлыг тодруулав.

1. Шүлхий, годрон өвчний гаралтын нөхцөл байдлын талаар

Шүлхий өвчний гаралтын нөхцөл байдлыг годрон өвчинтэй холбон авч үзэж, нарийвчлан шалгаж өгөхийг сайд танаас хүсье. Өмнө нь өвчний гаралт баруун, зүүн урд чиглэлд голчлон бүртгэгддэг байсан бол одоо Замын-Үүдээр годрон өвчний гаралт ажиглагдаж байгаа нь анхаарал татаж байна. Иймд өвчний тархалтын шалтгаан, нөхцөл байдлыг нарийвчлан судалж, гаднын болон хөндлөнгийн нөлөөлөл байгаа эсэхийг шалгаж тогтоох шаардлагатай гэж үзэж байна.

2. Төмс, хүнсний ногооны худалдан авалтын талаар

Төмс, хүнсний ногооны 12 мянган тонн бүтээгдэхүүн худалдан авч эхэлсэнтэй холбоотойгоор орон нутагт 7.5 мянган тонн бүтээгдэхүүнийг хоёр байршилд худалдан авч байгаа талаар мэдээлэл байна. Иймд худалдан авалт хийж буй байршлууд, хэрэгжүүлж байгаа журам, холбогдох мэдээллийг нэгтгэн ирүүлнэ үү. Уг мэдээллийг орон нутгийн үйлдвэрлэгчид, иргэдэд хүргэх шаардлагатай байна. Мөн худалдан авалтын цэгүүдийн тоо, байршил нь үйлдвэрлэгчдийн бүтээгдэхүүнийг бүрэн хамрах боломжтой эсэхийг тодорхой болгох нь зүйтэй.

3. Улсын төсөв, шинэ техникийн 50 хувийн дэмжлэгийн талаар

Улсын төсвийн хэлэлцүүлгийн хүрээнд УИХ-ын 36 дугаар тогтоолтой холбоотой шинэ техник худалдан авахад олгох 50 хувийн дэмжлэгийн асуудлаар тодорхой мэдээлэл авах шаардлагатай байна. Иймд энэ асуудалд Болорчулуун дарга хариулт өгнө үү.

Тодруулбал:

* Өмнө нь уг дэмжлэгийг ямар журмаар, хэдий хэмжээний санхүүжилтээр олгож байсан бэ?

* Сүүлд төсөвлөж, шийдвэрлэсэн санхүүжилт ямар зориулалтаар зарцуулагдсан бэ?

* 2027 онд уг дэмжлэгийг үргэлжлүүлэн хэрэгжүүлэх эсэх, шаардлагатай санхүүжилтийг төсөвт хэрхэн тусгахаар төлөвлөж байна вэ?

Эдгээр асуудлаар бодит мэдээлэл, тодорхой хариулт өгч, цаашдын бодлого, санхүүжилтийн төлөвлөлтийг тодорхой болгох шаардлагатай байна.