С.Эрдэнэболд: Төсөв бол улс төрийн өрсөлдөөний хэрэгсэл биш, хөгжлийг чиглүүлэх бодлогын хэрэгсэл юм

Аюулгүй байдал, гадаад бодлогын байнгын хорооны /2026.10.22/ хуралдаанаар УИХ-ын гишүүн С.Эрдэнэболд дараах байр суурийг илэрхийлэв.

Өнөөдөр УИХ-ын Аюулгүй байдал, гадаад бодлогын байнгын хорооны хуралдаанаар улсын төсвийн хөрөнгө оруулалттай холбоотой зарчмын зөрүүтэй саналуудыг хэлэлцлээ.

Төсвийн хөрөнгө оруулалтыг бүхэлд нь танах боломжгүй. Улс орны хөгжил, батлан хамгаалах чадавх, гамшгийн бэлэн байдлыг хангахад зайлшгүй шаардлагатай хөрөнгө оруулалтууд бий.

Тухайлбал, цэргийн алба хаагчдын амь нас, эрүүл мэндийг хамгаалах, гамшгаас хамгаалах нэгдсэн удирдлагын тогтолцоог бэхжүүлэх, Зэвсэгт хүчний анги, байгууллагын барилга байгууламж, орон сууцны асуудлыг шийдвэрлэх нь хойшлуулж болохгүй асуудал юм.

Гэхдээ иргэдийн бухимдаж буй гол асуудал бол төр өөрийн зардлаа хангалттай хэмнэж, данхар бүтцээ цомхон болгож чадаж байгаа эсэх юм.

Төсвийн асуудал зөвхөн танах тухай биш. Харин ямар зарчмаар төсвөө төлөвлөж, хуваарилах тухай асуудал юм.