Б.Жаргалан: Татвар төлөгчдийн мөнгийг бэлтгэл хангаагүй төсөлд хуваарилдаг байдлыг зогсоох ёстой!

Эдгээр өдрүүдэд Монгол Улсын Төсвийн тухай хуулиудыг УИХ, байнгын хороодоор хэлэлцүүлж байна.

УИХ-ын гишүүн Б.Жаргалан дараах байр суурийг илэрхийллээ.

2027 оны төсвийн зарлага 43.6 их наяд төгрөгт хүрч, нэг жилийн дотор 10.7 их наяд төгрөгөөр нэмэгдэхээр байна. Төсвийн ийм огцом тэлэлт нь үнийн өсөлтийг хөөрөгдөж, үр ашиггүй зарцуулалт, авлигын эрсдэлийг нэмэгдүүлэн, эдийн засгийн тэнцвэрийг алдагдуулах аюултай.

Бидний хийсэн тооцоо, судалгаагаар төсвийн зарлагыг дор хаяж 5 их наяд төгрөгөөр бууруулах шаардлагатай. Үүний тулд эхлээд тооцоо, төлөвлөгөө, батлагдсан зураг төсөвгүй зардлуудыг танах ёстой.

Иймээс УИХ-ын гишүүний бүрэн эрхийн хүрээнд төсвийн гурав дахь хэлэлцүүлэгт эдгээр зардлыг хасах зарчмын зөрүүтэй санал гаргалаа. Тухайлбал, аудитын байгууллагын дүгнэлтэд дурдсан, батлагдсан зураг төсөвгүй 1.8 их наяд төгрөгийн хөрөнгө оруулалтын зардлыг хасах саналаа холбогдох байнгын хороодоор санал хураалгаж байна.

Татвар төлөгчдийн мөнгийг бэлтгэл хангаагүй төсөлд хуваарилдаг байдлыг зогсоох ёстой.