2026-2027 онд төрийн өмчийн сургууль, цэцэрлэгийн 37 зуухыг шингэрүүлсэн нефтийн хийн халаалтад шилжүүлнэ

БОУАӨ-ийн сайд Ц.Сандаг-Очир "Өрхийн түвшинд нүүрсний хэрэглээнээс үе шаттай татгалзах арга зам" үндэсний форумд оролцлоо.

Сайд хэлсэн үгэндээ, Улаанбаатар хотод 2026-2027 оны халаалтын улиралд төрийн өмчийн сургууль, цэцэрлэгийн 37 зуухыг шингэрүүлсэн нефтийн хийн халаалтад шилжүүлнэ. Ингэснээр жилд 15,478.6 тонн хатуу түлшний хэрэглээг бууруулна. Энэ 7,326 өрхийн хэрэглээтэй дүйцнэ.

Түүнчлэн байгаль орчинд ээлтэй, дэвшилтэт технологи нэвтрүүлж, хийн түлшээр дулааны эрчим хүч үйлдвэрлэж буй шаардлага хангасан ААН-үүд ААНОАТ-ын хөнгөлөлт эдлэх боломж бүрдсэн.

Энэхүү татварын бодлогын хөшүүрэг нь хувийн хэвшлийн хөрөнгө оруулалтыг дэмжих, хийн халаалтын технологийн хэрэглээг нэмэгдүүлэх, түүхий нүүрсний хэрэглээг бууруулах, улмаар агаарын бохирдлыг бууруулж, хүн амын эрүүл мэндийг хамгаалахад бодит алхам болох юм.

Энэ мэтчилэн агаарын бохирдлыг бууруулах зорилтын хүрээнд өрхийн түвшинд цэвэр эрчим хүчинд шилжих үйл явцыг эрчмжүүлж, салбар дундын уялдаа холбоог сайжруулж, эрчимжүүлэх ажлыг өнөөдрөөс эхлүүлж байгааг тодотгов.