Байгаль орчны салбарын төсөв 267.98 тэрбум төгрөгөөр батлагдлаа

Монгол Улсын Засгийн газраас 2026 оны 8 дугаар сарын 31-ний өдөр өргөн барьсан 2027 оны Төсвийн төсөл болон дагалдан өргөн мэдүүлсэн бусад хуулийн төслийг 2026 оны 11 дүгээр сарын 13-ны өдрийн УИХ-ын ээлжит чуулганы хуралдаанаар эцэслэн баталлаа.

Байгаль орчин, уур амьсгалын өөрчлөлтийн салбарын 2027 оны улсны төсвийг 267,98 тэрбум төгрөгөөр батлав. Иргэдийн эрүүл, аюулгүй орчинд амьдрах нөхцөлийг сайжруулах, усны нөөцөө хамгаалах, ой, газар нутгаа нөхөн сэргээх, байгалийн гамшиг, уур амьсгалын эрсдэлд бэлэн байх, байгаль хамгааллын үйл ажиллагааг орон нутагт бодитой хэрэгжүүлэхэд чиглүүлж байна.

Ирэх 2027 онд салбарын хэмжээнд орон тоог нэмэгдүүлэхгүй бөгөөд нийт 87 харъяа байгууллагын 2,915 албан хаагчийн бүтэцтэй ажиллана.

2027 оны төсвийг 7 үндсэн хөтөлбөр, 39 үр дүнгийн шалгуур үзүүлэлттэй төлөвлөсөн.

Тухайлбал, “Нэг сум-Нэг нуур” төслийн хүрээнд нийт 20 байршилд 9.3 тэрбум төгрөгийн хөрөнгө оруулалтаар хөв, цөөрөм байгуулах ажлыг хэрэгжүүлнэ.

Энэхүү төслийг хэрэгжүүлснээр хөв, цөөрөм нэмэгдэх нь мал услах боломжийг сайжруулах, бэлчээрийн усан хангамжийн ачааллыг тараах, ган, хуурайшилтын үед тодорхой хэмжээний усны нөөц бүрдүүлэх ач холбогдолтой юм.

Мөн Дундговь аймгийн Дэрэн, Дорноговь аймгийн Хатанбулаг, Говь-Алтай аймгийн Бугат зэрэг усны асуудал тулгамдсан сумдад хүн амын ус хангамжийн эх үүсвэрийн хайгуул, судалгаа хийхээр төлөвлөлөө.

Түүнчлэн 1,715 га-аас доошгүй талбайд ойжуулалт, нөхөн сэргээлт хийж, 1.7 сая га талбайд судалгаа хийж, 158.5 мянган га-аас багагүй талбайд ойн хөнөөлт шавжтай тэмцэж, 1.2 сая га талбайд ойн арчилгаа, цэвэрлэгээ хийнэ. Энэ нь ойн сан, усны эх үүсвэрийг хамгаалах, түймрийн эрсдэлийг бууруулах, экосистемийн тогтвортой байдлыг хадгалахад бодит үр дүн авчрах юм.

Тусгай хамгаалалттай газар нутгийн хамгаалалтыг сайжруулах чиглэлд долоон төсөл, арга хэмжээнд 3.8 тэрбум төгрөг санхүүжүүлэхээр төлөвлөлөө.

Салбарын бодлого, хөтөлбөрийг газар дээр нь хэрэгжүүлдэг хүмүүс бол байгаль хамгаалагч, сав газрын мэргэжилтэн, цаг уурын ажиглагч, шинжээчид юм. Өнөөдөр 21 сав газрын захиргаа, 35 тусгай хамгаалалттай газрын хамгаалалтын захиргаа орон нутагт ажиллаж байна. Иймээс 2027 оны төсөвт орон нутагт ажиллаж байгаа төрийн албан хаагчдын цалин, хуульд заасан орон нутгийн нэмэгдэл, урамшууллын зардлыг тусгасан.

Байгаль орчин, уур амьсгалын өөрчлөлтийн сайдын төсвийн багцын нийт 2,915 албан хаагчийн 2,152 нь төрийн үйлчилгээний, 763 нь төрийн захиргааны албан хаагч байна.

Төрийн үйлчилгээний 2,152 орон тоог цалингийн ангиллаар нь авч үзвэл,

• ТҮ ангилалд 398

• Мэргэжлийн үйлчилгээний ТҮМ ангилалд 1,715

• Шинжлэх ухааны ТҮШУ ангилалд 34

• Мэдээллийн технологийн ТҮМТ ангилалд 5 орон тоо байна.

Төрийн үйлчилгээний 2,152 албан хаагчийн үндсэн цалинг 2026 оны 11 дүгээр сарын 1-нээс 2025 оны түвшинтэй харьцуулахад 50 хувиар нэмэгдүүлсэн. 2027 оны улсын төсвийн төсөлд эдгээр албан хаагчийн үндсэн цалинг дөрөвдүгээр сараас буюу II улирлаас 10 хувиар нэмэгдүүлэхээр тусгасан байна.