Д.Үүрийнтуяа: Тариаланчдын хохирлыг улсын төсвөөс нөхөх бус, эрсдэлийг урьдчилан тооцох тогтвортой санхүүгийн механизм хэрэгтэй

ТАРИАЛАНГИЙН ИНДЕКСЖҮҮЛСЭН ДААТГАЛ – УУР АМЬСГАЛЫН ЭРСДЭЛИЙГ УРЬДЧИЛАН УДИРДАХ БОДЛОГЫН ШИНЭЧЛЭЛ

Өнөөдөр /2026.11.12/ УИХ-ын нэгдсэн чуулганаар УИХ-ын гишүүн С.Эрдэнэболд нарын гишүүдийн хамтран санаачилсан “ТАРИАЛАНГИЙН ИНДЕКСЖҮҮЛСЭН ДААТГАЛЫН ТУХАЙ АНХДАГЧ ХУУЛЬ”-ийн төслийг хэлэлцэж байна.

УИХ-ын гишүүн Д.Үүрийнтуяа уг хуулийн төслийн хамтран санаачлагчийн хувьд дэмжин ажиллаж байна.

Тэрбээр "Газар тариалангийн үйлдвэрлэл ган, хуурайшил, хэт халалт, хур тунадасны дутагдал зэрэг уур амьсгалын эрсдэлд өртөмтгий бөгөөд энэ нь тариаланчдын орлого, үйлдвэрлэлийн тогтвортой байдал төдийгүй хүнсний хангамж, аюулгүй байдалд шууд нөлөөлдөг.

Хуулийн төслийн гол шинэчлэл нь хохирол учирсны дараа талбай бүрээр үнэлгээ хийж нөхөн төлдөг уламжлалт аргаас цаг уур, хөрсний чийг, ургамлын өсөлт, ургацын хэмжээ зэрэг хэмжигдэхүйц индексэд суурилсан даатгалын тогтолцоонд шилжих юм. Ингэснээр нөхөн төлбөрийг ил тод шалгуураар, шуурхай шийдвэрлэх боломж бүрдэнэ.

Мөн тариаланч, даатгалын компани, хамтын эрсдэлийн сан, давхар даатгалын тогтолцооны оролцоог уялдуулж, шинээр сан, байгууллага байгуулахгүйгээр Малын индексжүүлсэн даатгалын хүрээнд бүрдсэн тогтолцоог ашиглахаар тусгасан.

Энэ нь тариаланчдын хохирлыг улсын төсвөөс нөхөх бус, эрсдэлийг урьдчилан тооцож, төр, даатгалын зах зээл, тариаланчдын хооронд хариуцлагыг зохистой хуваарилах тогтвортой санхүүгийн механизм бүрдүүлэх зорилготой.

Энэхүү эрх зүйн шинэчлэл нь уур амьсгалын эрсдэлийг урьдчилан удирдах, хөдөө аж ахуйн үйлдвэрлэлийн санхүүгийн тогтвортой байдлыг хамгаалах, төрийн дэмжлэгийг оновчтой чиглүүлэх замаар хүнсний хангамж, аюулгүй байдлыг бэхжүүлэх ач холбогдолтой" гэдгийг тодотгов.