Цэргийн төв эмнэлгийн бэлэн байдал, оношилгоо, эмчилгээний чадавхыг бэхжүүллээ

Бид 2026 оныг “Хүн төвтэй хөгжил – Шинэчлэлийн жил” болгон зарлаж, алба хаагчдынхаа ажиллах орчин, нийгмийн баталгаа, эрүүл мэндийн хамгаалалтыг сайжруулахад чиглэсэн бодлого, шийдвэрүүдийг бодит ажил болгон хэрэгжүүлж байна.

Энэ хүрээнд Зэвсэгт хүчний Цэргийн төв эмнэлэгт бүрэн тоноглогдсон яаралтай түргэн тусламжийн автомашинуул, 1.5 тэрбум орчим төгрөгийн үнэ бүхий орчин үеийн эмнэлгийн тоног төхөөрөмж хүлээлгэн өгч, эмнэлгийн удирдлага, эмч, ажилтан, алба хаагчидтай уулзлаа.

Энэхүү хөрөнгө оруулалтын хүрээнд:

* “Olympus” брэндийн хоол боловсруулах замын оношилгооны 16 нэр төрлийн 18 нэгж тоног төхөөрөмж;

* Сэргээн засах, хөдөлгөөн засал эмчилгээний 16 нэр төрлийн 19 нэгж тоног төхөөрөмж;

* Хордлогын үеийн цус цэвэршүүлэх эмчилгээний 3 нэр төрлийн 3 нэгж тоног төхөөрөмж;

* Гемодиализ эмчилгээний аппарат, ус цэвэршүүлэх системийг тус тус хүлээлгэн өглөө.

Мөн төрийн байгууллагуудын хамтын ажиллагааны үр дүнд Цэргийн төв эмнэлгийн дэд бүтцийг сайжруулах нэгэн чухал бүтээн байгуулалтыг хэрэгжүүллээ.

Тодруулбал, Баянзүрх дүүргийн ЗДТГ-тай хамтран ажиллаж, тус дүүргийн 2026 оны төсөвт 400 сая төгрөгийн санхүүжилтийг тусгуулан, Цэргийн төв эмнэлгийн “Б” блокийг урьдчилан сэргийлэх үзлэгийн байртай холбох гүүрэн барилгыг ашиглалтад орууллаа.

Энэ бол Батлан хамгаалах салбар, орон нутгийн удирдлагын хамтын ажиллагаа бодит бүтээн байгуулалт болж, иргэд, цэргийн алба хаагчдад хүрч буйн нэг илрэл юм.

Уг гүүрэн барилга ашиглалтад орсноор эмнэлгийн барилгуудын хоорондын уялдаа холбоо сайжирч, үйлчлүүлэгчид, эмч, эмнэлгийн ажилтнуудын зорчих нөхцөл илүү аюулгүй, тав тухтай болохын зэрэгцээ тусламж үйлчилгээний хүртээмж, шуурхай байдалд эерэг нөлөө үзүүлнэ.

Цэргийн төв эмнэлэг нь цэргийн алба хаагчдаас гадна энгийн иргэдэд эрүүл мэндийн тусламж үйлчилгээ үзүүлдэг, гамшиг, онцгой нөхцөл, энхийг дэмжих ажиллагааны үед үүрэг гүйцэтгэх чадавхтай стратегийн чухал байгууллага билээ.

Иймд эмнэлгийн бэлэн байдал, оношилгоо, эмчилгээний чадавхыг нэмэгдүүлэхийн зэрэгцээ төрийн болон орон нутгийн байгууллагуудтай хамтын ажиллагаагаа өргөжүүлж, хүн төвтэй хөрөнгө оруулалт, бүтээн байгуулалтыг үе шаттай хэрэгжүүлж байна.