Үйл явдал2 мин унших
Иргэдийн орлого, бизнес эрхлэгчдийг дэмжих бодлогыг улсын төсөвт тусгалаа

Өнөөдөр УИХ-ын чуулганы нэгдсэн хуралдаанаар Монгол Улсын 2027 оны нэгдсэн төсвийг эцэслэн баталж, Төсвийн тухай хуулийн төслийг хуралдаанд оролцсон гишүүдийн 83.6 хувийн (110 гишүүнээс 91 нь) саналаар дэмжлээ.
Дэлхийн эдийн засаг тогтворгүй, үнийн өсөлтийн эрсдэл өндөр байгаа энэ цаг үед төрийн нэн тэргүүний үүрэг бол айл өрхийн амьжиргаа, аж ахуйн нэгжүүдийн үйл ажиллагааг хамгаалах явдал юм. Энэхүү зарчмыг баримтлан баталсан ирэх оны төсвөөр дараах бодит арга хэмжээнүүд хэрэгжинэ.
Ирэх онд:
- Сарын 792 мянган төгрөг хүртэлх цалингаас хүн амын орлогын албан татвар авахгүй;
- Дундаж тэтгэвэр 1.3 сая төгрөгт хүрнэ;
- Хөгжлийн бэрхшээлтэй иргэний тэтгэвэр, тэтгэмж болон ахмад настны халамж 600 мянган төгрөг болж нэмэгдэн, нийт 171 мянган иргэн хамрагдана;
- II улирлаас төрийн үйлчилгээний албан хаагчдын цалин 10 хувь, төрийн захиргааны болон тусгай албан хаагчдын цалин 20 хувиар тус тус нэмэгдэнэ;
- Даралт, зүрх судас, чихрийн шижингийн зарим нэн шаардлагатай эмийг Эрүүл мэндийн даатгалын сангаас 100 хувь хөнгөлнө;
- Улсын хэмжээнд 45 эмнэлэг шинээр баригдана;
- Ипотекийн зээлд 500 сая ам.доллар хүртэлх шинэ эх үүсвэр татаж, 16 мянган өрхийг орон сууцжуулна;
- 180 мянга орчим бизнес эрхлэгчийн татварын ачаалал 246 тэрбум төгрөгөөр буурна;
- Гарааны бизнесийн эхний гурван ажилтны ажил олгогчийн нийгмийн даатгалын шимтгэлийг 36 сарын хугацаанд чөлөөлнө.

УИХ-ын гишүүн Н.Батсүмбэрэл:
Онцгойлон ач холбогдол өгч буй чиглэл бол боловсролын салбарын хөрөнгө оруулалт юм.
“Боловсролд хөрөнгө оруулъя” бодлогын хүрээнд 2027 онд 1.0 их наяд төгрөг төсөвлөж, улсын хэмжээнд 137 сургууль, 72 цэцэрлэг, 41 дотуур байр барихаар боллоо. Улсын хөгжил хүний хөгжлөөс эхэлдэг. Боловсролын хөрөнгө оруулалт гэдэг зөвхөн барилга байгууламж барих асуудал бус, хүүхэд бүрийн сурч боловсрох тэгш боломж, сургалтын орчны чанар, хүртээмжийг сайжруулах суурь нөхцөл юм. Иймд батлагдсан хөрөнгө оруулалтыг бодит ажил болгож, үр дүнд хүргэх нь юу юунаас чухал.
Төсөв батлах нь ажлын зөвхөн эхлэл. Одоо Засгийн газар батлагдсан төсвийг үр дүнтэй хэрэгжүүлж, үнийн өсөлтийн дарамтыг иргэд, бизнес эрхлэгчдийн нуруунд үүрүүлэхгүй байхад онцгой анхаарах учиртай.
