Монгол Улсын Их Хурлын дарга С.Бямбацогт, Монгол-Японы парламентын бүлгийн дарга, гишүүдийн хамтаар өнөөдөр (2026.05.13) Япон Улсаас Монгол Улсад суугаа Элчин сайд Игавахара Масарүг хүлээн авч уулзлаа.

Уулзалтын эхэнд Улсын Их Хурлын дарга С.Бямбацогт, Монгол Улсын ”гуравдагч хөрш”, Тусгай стратегийн дотно түнш Япон Улстай найрсаг харилцаа, хамтын ажиллагааг гүнзгийрүүлэн хөгжүүлэхэд Монгол Улсын Их Хурал өндөр ач холбогдол өгдөг гэдгийг онцлов.

2025 онд Япон Улсын Цог Жавхлант Эзэн Хаан, Эрхэм дээд Хатан нарын Монгол Улсад анх удаа хийсэн төрийн айлчлал түүхэн чухал үйл явдал болсныг онцлон тэмдэглэв. Мөн энэ оны 04 дүгээр сарын 29-нөөс 05 дугаар сарын 02-ны өдрүүдэд Япон Улсын Парламентын Төлөөлөгчдийн танхимын гишүүн, тус танхим дахь Япон-Монголын найрамдлын бүлгийн Ажлын албаны дарга Такэбэ Арата тэргүүтэй төлөөлөгчид Монгол Улсад айлчилсан нь хоёр улсын найрсаг харилцааг гүнзгийрүүлэхэд парламент болон парламент дахь найрамдлын бүлгүүд жинтэй үүрэг гүйцэтгэж ирсний нотолгоо хэмээн тэмдэглэсэн юм.

Мөн талууд Япон Улсын Засгийн газрын хөнгөлөлттэй зээлийн хүрээнд “Чингис Хаан” олон улсын нисэх онгоцны буудлыг өргөтгөх, хүчин чадлыг нэмэгдүүлэх асуудлыг шуурхайлах нь аялал жуулчлалыг хөгжүүлэхэд томоохон хөшүүрэг болно гэдэгт санал нэгдэж байгаагаа нотлов.

Энэ үеэр УИХ-ын гишүүн О.Саранчулуун Монгол-Японы парламентын бүлгийн гишүүний хувиар дараах асуудлыг хөндөв.

Үүнд:

Хөгжлийн бэрхшээлтэй хүн, ахмад настын урт хугацааны асаргааны асуудлаар хамтын ажиллагаа
Японд хөгжлийн бэрхшээлтэй 2 парламентийн гишүүн байдаг, тэдэнтэй хамтран ажиллах, холбогдох
Туслах технологийн татварын асуудлаар мэдээлэл солилцох
Монгол-Японы эмнэлэгт хэрэгжүүлдэг “үйлчлүүлэгчийг дэмжих алба”-ын туршлагыг түгээн дэлгэрүүлэх
Саадгүй орчин, хүртээмжийн чиглэлээр туршлага солилцох уулзалт, хамтын ажиллагааны талаар тус тус саналаа хэллээ. Элчин сайдтай тусдаа уулзаж дэлгэрэнгүй ярилцахаар боллоо.

Цаашид хамтын ажиллагааг эдийн засгийн харилцаагаар гүнзгийрүүлж, Монгол Улс, Япон Улсын хооронд дипломат харилцаа тогтоосны 55 жилийн тэмдэглэлт ой тохиож буй 2027 онд хоёр улсын найрсаг харилцаа, ард иргэдийн найрамдал нөхөрлөл улам батжин гүнзгийрнэ гэдэгт итгэл төгс байгаагаа илэрхийллээ.

Японы Элчин сайдтай саадгүй орчин, хүртээмжийн чиглэлээр санал солилцох уулзалт хийхээр болов