Н.Учрал: Бизнес эрхлэгч Монголчууд “хоёр улсын хооронд бизнес хийхэд төр нь гүүр болж өгөөч” гэж хүсэж байна!

“Японоос Монголд очиж байгаа автомашин үнэхээр аюулгүй юу?”

Осолд орсон, эвдрэл гэмтэлтэй автомашин Монголд орж ирж, засварлаад зарагддаг асуудлыг иргэд хөндлөө. Энэ бол зөвхөн машины чанарын асуудал биш. Монгол хүний амь нас, аюулгүй байдлын асуудал. Импортын автомашины түүх, техникийн байдлыг хилээр нэвтрэхээс өмнө нягталдаг тогтолцоог сайжруулах шаардлагатай.  Японы холбогдох байгууллагуудтай мэдээлэл солилцож, эвдрэл гэмтлийн мэдээллийг иргэн машин худалдаж авахаасаа өмнө мэддэг байх боломжийг бүрдүүлэх чиглэлээр ажиллана.

“Японд сурсан мэдлэгээ Монголдоо ашигламаар байна. Гэхдээ буцаж очоод хаана ажиллах вэ?”

Олон жил Японд сурч, ажилласан инженер, технологийн мэргэжилтэн, чадварлаг залуус ийм асуудал тавьж байна. Монгол хүн гадаадад мэдлэг, туршлага хуримтлуулаад эх орондоо ирэхэд хаалга нь нээлттэй байх ёстой. Японд байгаа мэргэжилтнүүдээ Монголын төрийн байгууллага, томоохон компаниудтай шууд холбодог нээлттэй ажлын байрны өдөрлөгийг тогтмол зохион байгуулах саналыг ажил хэрэг болгоно. Танил тал биш, мэдлэг чадвар нь ажлын байрны шалгуур байх ёстой.

Японд өнөөдөр 21 мянга гаруй монгол иргэн амьдарч байна. Тэдний 5 мянга гаруй нь хүүхэд.

Эцэг, эхчүүд хүүхдээ эх хэлээ мартахгүй, түүх соёлоо мэддэг Монгол хүн болгон өсгөхийг хүсэж байна.

Японд арван жил үйл ажиллагаа явуулсан “Миний Монгол” сургууль ч энэ хэрэгцээг бодитоор харуулж байна. Тиймээс Монгол сургуулийн тогтвортой байр, сургалтын орчны асуудлыг холбогдох байгууллагуудтай хамтран шийдвэрлэх гарцыг судалж, шийдвэрлэх үүрэг өглөө.

Иргэдийн хамгийн их хөндсөн асуудлын нэг нь нийгмийн хамгаалал байлаа.
Хүн гадаадад арван жил ажиллачихаад Монголдоо ирэхэд тэр хөдөлмөрийн жилүүд нь “алга болдог” байж болохгүй. Гадаадад ажилласан жил, төлсөн нийгмийн даатгал нь ирээдүйн тэтгэвэр, нийгмийн баталгаатай нь уялддаг тогтолцоотой болох ёстой. Энэ чиглэлээр тодорхой шийдэл гаргаж, цаг алдалгүй ажиллах үүрэг салбарын сайд Т.Аубакирт өглөө.
 

Бизнес эрхлэгч Монголчууд “хоёр улсын хооронд бизнес хийхэд төр нь гүүр болж өгөөч” гэж хүсэж байна.Энэ удаагийн айлчлалаар дэлхийн 56 улсад 76 оффистой, 1,980 ажилтантай Японы гадаад худалдааг дэмжих JETRO байгууллага Монголд төлөөлөгчийн газраа нээж, үйл ажиллагаа явуулахаар боллоо. Таны бизнест Япон улсын зах зээл нээгдэнэ. Таны үйлдвэрлэлд Япон технологи, ноу-хау нэвтэрнэ. Танд Японы хөрөнгө оруулагч, түнштэй шууд холбогдох гүүр бий болно.

Гадаадад хөдөлмөрлөж, зүтгэж, сурч байгаа Монгол хүн бүрийн сэтгэлд эх орны хөгжил дэвшил байдаг. Тэнд сурсан мэдлэг, эзэмшсэн технологи, хуримтлуулсан туршлага Монголын баялаг.

Иргэдийнхээ өмнө тулгамдсан асуудлыг шийдэхээр Засгийн газар ажилласаар байна.

Японд ажиллаж, амьдарч, сурч байгаа иргэдтэйгээ уулзав.