Парламентчдын хүний эрхийн асуудлаар орон орны төлөөлөлтэй санал солилцлоо

УИХ-ын гишүүн О.Номинчимэг Олон Улсын Парламентын Холбооны Парламентчдын хүний эрхийн хорооны Ерөнхийлөгчийн хувиар Бангладеш, Турк, Танзани зэрэг 11 улсын төлөөлөгчидтэй уулзаж  тухайн улстай холбоотой парламентчдын хүний эрхийн асуудлаар санал солилцох, асуулт мэдээлэл лавлах уулзалтууд зохион байгууллаа.

Хүний эрхийн асуудлыг шийдвэрлэхэд олон улсын байгууллагын шийдвэр чухал боловч тухайн улсын эрх бүхий байгууллагуудын хамтын ажиллагаа, мэдээлэл солилцоо нь түүнээс дутахгүй чухал.

Тэр дотор Зимбабве, Уганда, Эсватини улсын парламентын дарга нартай уулзаж, парламентчдын хүний эрхийн асуудлаар ярилцлаа.

"Асуудал нь хэлэлцэгдэж буй улс орнууд зэвсэгт мөргөлдөөн, авторитар дэглэм, иргэний дайн гэх мэт олон янзын дотоод нөхцөл байдалтай байдаг.

Иймд улс орнуудын дотоод нөхцөл байдалд хүндэтгэлтэй хандахын сацуу иргэдээс мандат авсан төлөөлөгчдийн эрхийг хамгаалах, зөрчигдсөн эрхийг сэргээх асуудлаар “парламентын дипломат ажиллагаа” чухал байдаг.

Парламентчдын хүний эрхийг хамгаалах нь зөвхөн тухайн хүний эрх ашгийг хамгаалах тухай биш. Энэ бол иргэдийн сонголт, парламентын бие даасан байдал, хууль дээдлэх ёс, ардчилсан төлөөллийг хамгаалах тухай юм. Ийм ч учраас энэ ажлыг хариуцлагатай, мэргэжлийн байж хүний эрх, ардчиллын үнэт зүйлсийг хамгаалах үйл хэрэгт хувь нэмрээ оруулж байгаагаа ухамсарлаж, хичээн ажилладаг." хэмээн О.Номинчимэг гишүүн онцлов.