Социал Демократ Монголын Эмэгтэйчүүдийн Холбооноос зохион байгуулж буй “Бүтээлч өсөлт–2026” бизнес эрхлэгч эмэгтэйчүүдийн Баруун бүсийн чуулган өнөөдөр /2026.10.18/ Ховд хотод эхэллээ. Чуулганд Баян-Өлгий, Говь-Алтай, Завхан, Увс, Ховд аймгийн бизнес эрхлэгч эмэгтэйчүүд оролцож байна.

Чуулганыг нээж СДМЭХ-ны Ерөнхий нарийн бичгийн дарга У.Өнөрцэцэг үг хэллээ. Мөн нээлтийн арга хэмжээнд Монгол Улсын Их Хурлын дарга С.Бямбацогт хүрэлцэн ирж, Баруун бүсийн бизнес эрхлэгчдийн онцлог, бизнес эрхлэх эрх зүйн орчин болон хөгжлийн боломжийн талаар үг хэлэв.
Энэхүү чуулган нь СДМЭХ-ны 2026–2030 оны W-O-M-E-N таван тулгуурт бодлогын “Opportunity”, “Entrepreneur” чиглэлийн хүрээнд эмэгтэйчүүдийн бизнес, эдийн засаг дахь оролцоог нэмэгдүүлэх, бизнес эрхлэх боломжийг өргөжүүлэх зорилготой. Энэ хүрээнд санхүүжилт, зах зээл, мэдлэг, ур чадвар, инновацийн хүртээмжийг нэмэгдүүлж, орон нутгийн бизнес эрхлэгч эмэгтэйчүүдийн санал, хэрэгцээг бодлого, шийдвэрт тусгахад анхаарч ажиллаж байна.

Нээлтийн арга хэмжээтэй зэрэгцэн Баруун бүсийн бизнес эрхлэгч эмэгтэйчүүдийн бүтээгдэхүүн, үйлчилгээний үзэсгэлэн гарч байна. Үзэсгэлэнд оролцогчдод бизнесээ танилцуулах, харилцан туршлага солилцох, хамтын ажиллагаагаа өргөжүүлэх боломж бүрдүүлж байна.

"Бүтээлч өсөлт-2026" Баруун бүсийн чуулган Ховд хотод эхэллээ