Нэр бүхий хүмүүст үзүүлсэн, Ерөнхийлөгчийн уучлалыг Ерөнхийлөгч өөрөө хүчингүй болгох боломжтой гэх агуулгатай мэдээлэл сүүлийн үед түгж байгаа.

Энэ талаар УИХ-ын гишүүн О.Алтангэрэлээс тодрууллаа.

Энэ нь хууль эрх зүйн хувьд ямар ч боломжгүй юм.“Хүчингүй болгосон актыг хүчингүй болгоход, хүчингүй болгосон акт сэргэхгүй” гэдэг нэг зарчим байдаг. Энэ зарчмыг 200 жилийн өмнөөс эхлэн АНУ болон бусад улс орнууд хэрэглээд өнөөдрийг хүрсэн. Их энгийнээр тайлбарлахад иргэний газрыг Засаг даргын шийдвэрээр шүүхэд хүчингүй болгож болдог. Ийм тохиолдолд тухайн иргэн шүүхдээд тэр нь хууль бус байсан нь тогтоогдож, өмнө нь гарсан шийдвэрийг хүчингүй болгоход иргэний газар сэргэдэггүй. Зөвхөн тэр Засаг даргын буруу байсан гэдэг л харагддаг. Дахиж газар авахдаа шүүхээс шинэ процесс явагдаж байж шийдэгддэг.

Үүнтэй адил ганцхан Ерөнхийлөгчийн зарлигаар Монгол Улсад эрүүгийн ял шийтгэгдсэн шийдвэр хүчингүй болдог. Энэ зарлигийг буцаан хүчингүй болгож, хүнийг дахин хорих ямар нэгэн хууль зүйн үндэслэл, механизм, процесс Монгол Улсын хууль тогтоомжид огт тусгагдаагүй.

Гэтэл зарим хүмүүс Ерөнхийлөгчийн уучлалыг Ерөнхийлөгч өөрөө хүчингүй болгох боломжтой гэх агуулгатай мэдээлэл сүүлийн үед түгээж байгаа. Ингэж иргэдийг төөрөгдүүлж болохгүй. Үүн дээр хуульчид байр сууриа илэрхийлж зөв мэдээлэл нийгэмд түггэж байх хэрэгтэй.

Монгол Улсын Үндсэн хуулийн 33 дугаар зүйлийн 1 дэх хэсгийн 8-д зааснаар уучлал үзүүлэх нь Ерөнхийлөгчийн хэнтэй ч хуваалцахгүй онцгой бүрэн эрх юм. Энэхүү эрх зүйн зохицуулалтын дараах үндсэн зарчмуудыг анхаарах шаардлагатай:

• Зарлиг эргэж буцахгүй: Ерөнхийлөгч зарлиг гаргаж, ялтныг ял эдлэхээс бүрэн чөлөөлсөн бол уг шийдвэрийг дараа нь "бодлоо өөрчлөх" эсвэл субъектив шалтгаанаар цуцалж, буцаан хорих хуулийн заалт байдаггүй.

• Гэхдээ шинэ гэмт хэрэг үйлдвэл хоригдоно: Хэрэв суллагдсан хүн эрх чөлөөтэй байх хугацаандаа дахин шинээр гэмт хэрэг үйлдвэл хуулийн дагуу эрүүгийн хэрэг үүсгэн шалгаж, цагдан хорих болон дахин ял оноож хорих шийдвэрийг шүүхээс гаргана.

• Иргэний хохирол хэвээр үлдэнэ: Ерөнхийлөгчийн уучлал нь зөвхөн эрүүгийн ялаас (хорих ялаас) чөлөөлдөг болохоос тухайн хүний бусдад учруулсан эд хөрөнгийн болон сэтгэл санааны хохирлыг уучилдаггүй. Хохирогч тал хохирлоо иргэний журмаар нэхэмжлэх эрхтэй хэвээр байна.

Жич: Хууль зүйн нэр томьёоны хувьд УИХ-аас нийтээр нь хамруулж гаргадаг шийдвэрийг "Өршөөл", харин Ерөнхийлөгчийн тухайлсан хувь хүнд зориулж гаргадаг зарлигийг "Уучлал" гэж нэрлэдэг.

О.Алтангэрэл: Ерөнхийлөгчийн уучлалыг хүчингүй болгох огт боломжгүй!