Эдгээр өдрүүдэд Монгол Улсын төсвийн төслүүдийн хэлэлцүүлэг УИХ, байнгын хороодын хуралдаанаар ид үргэлжилж байна.

Засгийн газраас оруулж ирсэн төсвийн төсөлд 2027 оны улсын нэгдсэн төсвийн төсөлд тэнцвэржүүлсэн орлогыг 41.3 их наяд төгрөгөөр тооцсон. Мөн 2027 оны төсвийн төсөвт нийт зарлагыг 43.6 их наяд төгрөг, төсвийн алдагдлыг 2 их наяд 306 тэрбум төгрөг байхаар тусгаад байгаа юм.

Төсөв нь үний өсөлтийг хязгаарлаж, иргэдийн худалдан авах чадварыг хамгаалахын төлөө байх ёстой. Атал орлого, зарлагын тооцоолол эрсдэлд тооцоолбол бодитой, тэвчих боломжтой зардлуудыг бууруулсан байхыг хууль тогтоогчид болон шинжээчид шаардсаар байна.

УИХ-ын гишүүн Б.Жаргалан 2027 оны төсвийн хэлэлцүүлэгт нийт 3.1 их наяд төгрөгийн зардлыг бууруулах зарчмын зөрүүтэй санал гаргалаа. Ингэхдээ багш, эмч нарын үндсэн цалин, ахмадын тэтгэвэр, зорилтот бүлгийн тэтгэмжийг хамгаалж тооцжээ.

Саналууд:

ХӨРӨНГӨ ОРУУЛАЛТААС 124 ТӨСЛИЙН 2.472 ИХ НАЯД ТӨГРӨГИЙН САНХҮҮЖИЛТИЙГ ХАСАХ

2027 онд улсын төсөвт нийт 815 төсөл, арга хэмжээнд 5.8 орчим их наяд төгрөг зарцуулахаар төлөвлөсөн. Төсвийн хөрөнгө оруулалтын хэмжээ өмнөх оныхоос огцом тэлж байгаа тул эдийн засгийн хүчин чадлаа тооцвол зарим төсөл хэрэгжиж чадахгүй нь тодорхой байна. Түүнчлэн санхүүжилтийн 55.4 хувь нь 2026–2030 оны хөрөнгө оруулалтын төлөвлөгөөнд тусгагдаагүй төслүүдэд ногдож байна. Мөн зураг төсөв, төлөвлөлтийн шаардлага хангаагүй төслүүд бий.

Тиймээс Оюу толгойн ногдол ашгаар санхүүжүүлэх 52 төсөл, зураг төсөвгүй 40 төсөл, төлөвлөгөөнд тусгагдаагүй 5 төсөл болон бусад 27 төслийн санхүүжилтийг хасах санал гаргасан. Үүнээс Оюу толгойн ногдол ашгаар 2 их наяд төгрөгөөр санхүүжүүлэхээр төлөвлөсөн 52 төсөлтэй холбоотой хуулийн төслийг Засгийн газар татаж авсан.

2.УРСГАЛ ЗАРДЛЫГ 593.9 ТЭРБУМ ТӨГРӨГӨӨР БУУРУУЛАХ

Салбаруудад олгох татааснаас 518.7 тэрбум төгрөгийг хасах санал гаргасан. Зээлийн хүүгийн татаас нь давхар зах зээл бий болгож, өрсөлдөөнийг хязгаарлаж байгаа учраас энэ бодлогоос татгалзах шаардлагатай.

Мөн байрны түрээс, томилолт, зочны зардал, мэдээлэл сурталчилгаанд төлөвлөсөн нийт 75.2 тэрбум төгрөгийн НЭМЭГДЛИЙГ хасах саналыг тус тус гаргажээ.

Мөн тэрбээр “Татвар төлөгчдийн мөнгөөр санхүүжих зардал бүр үндэслэлтэй, үр ашигтай байх учиртай. Иргэдийн амьжиргааг хамгаалахын тулд төсвийн алдагдлыг бууруулж, үр ашиггүй зардлаас татгалзах ёстой”-г онцлоод байна.

Б.Жаргалан: "Зээлийн хүүгийн татаас" бодлогоос татгалзаж, урсгал зардлаас 518,7 тэрбумыг хэмнэх саналтай байна