хуулийн төслийн хэлэлцүүлэг2 мин унших
Санхүүгийн хэрэглэгчийн эрхийг хамгаалах тухай хуулийн төслийг хэлэлцлээ
Өнөөдөр УИХ-ын гишүүн Н.Батсүмбэрэл Монголбанкинд зохион байгуулагдсан “Санхүүгийн хэрэглэгчийн эрх хамгаалалт” хэлэлцүүлэгт хуулийн төсөл боловсруулах ажлын хэсгийн ахлагчийн хувиар оролцлоо.
Хэлэлцүүлгээр банк, санхүүгийн салбарын өнөөгийн нөхцөл байдал, олон улсын туршлага, хуулийн төслийн гол зохицуулалтуудыг танилцуулж, Монголбанк, Санхүүгийн зохицуулах хороо, банк, банк бус санхүүгийн байгууллага болон мэргэжлийн холбоодын төлөөлөлтэй санал солилцлоо.
Иргэд санхүүгийн үйлчилгээ авахдаа гэрээний нөхцөл, зээлийн хүү, шимтгэл, нэмэлт төлбөрийн талаар бүрэн мэдээлэл авч чадахгүй байх, эрх нь зөрчигдсөн тохиолдолд гомдол, маргаанаа шийдвэрлүүлэхэд хүндрэлтэй тулгарсаар байна.
Судалгаагаар иргэдийн 50 хувь нь санхүүгийн үйлчилгээний талаар бүрэн мэдээлэл авч чаддаггүй гэж хариулжээ. Мөн банкны салбарын хяналт шалгалтаар нэг жилийн хугацаанд иргэд, аж ахуйн нэгжтэй холбоотой 47 мянга орчим зөрчил илэрсэн ч банкуудад иргэдээс ердөө 6.5 мянган өргөдөл, гомдол ирүүлсэн байна.
Эдгээр асуудлыг шийдвэрлэх, иргэдийн эрх ашгийг хамгаалах, санхүүгийн үйлчилгээний ил тод, шударга байдлыг хангах зорилгоор Санхүүгийн хэрэглэгчийн эрхийг хамгаалах тухай анхдагч хуулийн төслийг боловсруулж байна.
Хуулийн төсөлд дараах гол зохицуулалтуудыг тусгаад байна.
Зээлийн хүү, шимтгэл, хураамж болон нэмэлт зардлыг багтаасан бодит өртгийг иргэдэд ойлгомжтой танилцуулах;
Зээлээ хугацаанаас өмнө бүрэн болон хэсэгчлэн төлөхөд нэмэлт торгууль, шимтгэл ногдуулахгүй байх;
Гэрээнд тусгаагүй төлбөр шаардах, нэмэлт үйлчилгээ тулган үзүүлэхийг хориглох;
Санхүүгийн байгууллага, хэрэглэгчийн хооронд үүссэн маргааныг үнэ төлбөргүй, шуурхай, хараат бусаар шийдвэрлэх тогтолцоог бүрдүүлэх.
Өнөөдрийн хэлэлцүүлгээс гарсан санал, байр суурийг хуулийн төслийг боловсронгуй болгоход тусган ажиллана. Маргааш үнэт цаасны зах зээл, даатгалын салбарын төлөөлөлтэй хэлэлцүүлгээ үргэлжлүүлнэ.
Иргэн бүр санхүүгийн үйлчилгээ авахдаа бүрэн, бодит мэдээлэлд үндэслэн сонголтоо хийдэг, эрх нь зөрчигдвөл хамгаалуулах боломжтой, шударга, ил тод санхүүгийн орчныг бүрдүүлэхийн төлөө ажиллаж байна.