Ирэх оны эхний өдрөөс хэт чихэртэй ундаанд онцгой албан татвар ногдуулах хууль хэрэгжиж эхэлнэ

Монгол Улсын Онцгой албан татварын тухай хуульд оруулсан нэмэлт, өөрчлөлтийн дагуу чихэр болон чихэр орлуулагч агуулсан ундаа, усанд онцгой албан татвар ногдуулах зохицуулалт 2027 оны нэгдүгээр сарын 1-ний өдрөөс эхлэн албан ёсоор хэрэгжиж эхэлнэ.

Сүүлийн долоон жилийн хугацаанд 7-14 насны  хүүхдийн таргалалт 7 дахин нэмэгдсэн гэсэн судалгаа гарсан. Энэ бол ноцтой тоо.

Энэ хууль татвар цуглуулах зорилгоор батлагдсан хууль биш, ирээдүйгээ хамгаалах эрүүл мэндийн асуудалд анхаарсан хууль болохыг УИХ-ын гишүүн, хууль санаачлагч С.Одонтуяа онцолж байна.

Хууль хэрэгжиж эхэлснээр

• Татвар ногдуулах босго: 100 мл тутамд 5 граммаас дээш чихэр болон чихэр орлуулагч агуулсан бүх төрлийн амтат ус, ундаа хамрагдана (100 мл-т 0–5 грамм чихэртэй бол татвар ногдуулахгүй).
• Татварын хэмжээ (шат дараалалтай):

•     2027 онд: 1 литр тутамд 500 төгрөг
•     2028 онд: 1 литр тутамд 525 төгрөг
•     2029 оноос эхлэн: 1 литр тутамд 550 төгрөг болох аж.