УИХ-ын чуулганы /2026.10.29/-ны өдрийн хуралдаанаар Нийгмийн халамжийн тухай хууль Шинэчилсэн найруулга/-ийн төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлыг хэлэлцэв.
Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.
УИХ-ын гишүүн Б.Мөнхсоёл:
Халамжийн бодлогын гол зорилго нь тухайн эмзэг бүлгийн иргэнийг ядуурал, эрсдэлээс хамгаалж бие даан амьдрах боломжийг нэмэгдүүлэх ёстой. Халамжаас хөдөлмөрт шилжих бодлого нь дэмжлэгийг шууд хасах бус ажиллах боломжийг бүрдүүлж орлого тогтворжихын хэрээр дэмжлэгийг аажмаар бууруулахад чиглэх ёстой. Нийгмийн халамжийг зайлшгүй хэрэгцээтэй зорилтот бүлэгт хүргэж хөдөлмөр эрхлэх боломжтой иргэдийг тогтвортой орлоготой болгох чиглэлийг дэмжиж байна.
Нэгт, Халамжийн бодлогыг хөгжлийн бодлого ажлын байртай хэрхэн холбов?
Орон нутгийн хөрөнгө оруулалт, үйлдвэрлэл, жижиг бизнесийн хөгжлөөр бий болох ажлын байрны хэрэгцээг зорилтот өрхийн ур чадвар, сургалт, ажил зуучлалтай хэрхэн уялдуулах вэ?
Халамжаас хөдөлмөрт шилжүүлэхэд шаардлагатай ажлын байр үйлчилгээний тооцоолол байна уу?
Ажиллах боломжгүй ажил олдохгүй тохирох ажлаас үндэслэлгүй татгалзаж байгаа нөхцөлийг хэрхэн ялгаж байна?
Төрөөс сургалт ажилд зуучлал шаардлагатай үйлчилгээг хүргэх үүрэг болон иргэний идэвхтэй оролцох хариуцлагыг хэрхэн уялдуулж байна вэ?
Хоёрт, Халамж авах зорилтот бүлгийг хэрхэн зөв тодорхойлох вэ?
Өрхийн орлого хөрөнгөөс гадна эрүүл мэнд, хөгжлийн бэрхшээл, асаргааны зардал, ажиллах бодит боломжийг хамтад нь үнэлэх үү?
Дэмжлэг шаардлагагүй иргэнийг хамруулахгүй шаардлагатай иргэнийг орхигдуулахгүй байх, буруу үнэлгээг шуурхай засах ямар баталгаа тусгасан бэ?
Ажилд ормогц хангамжийг огцом зогсоосноор цалин алдсан дэмжлэг, тээвэр, хүүхэд асрах зардлаа нөхөхгүй болох эрсдэлийг тооцно уу?
Орлого тогтворжих хүртэл дэмжлэгийг үе шаттай бууруулах зохицуулалт байна уу?
Гуравт, Нийгмийн халамжийн бодлогын шинэчлэлийг эдийн засаг, төсвийн боломжид нийцүүлж, үр дүнг нь хэрхэн хэмжих вэ?
Мөнгөн дэмжлэг шинэ үйлчилгээ, орон нутагт шилжүүлэх үүргийн нийт зардал санхүүжилтийн эх үүсвэрийг бүрэн тооцсон уу?
Хэрэгцээтэй иргэдийн хамгааллыг хадгалахын зэрэгцээ хэдэн өрхийг тогтвортой ажилтай орлоготой болгож ядуурлаас гаргах зорилт тавьсан бэ?
Мэдээж эмзэг бүлгээ хамгаална. Гэхдээ нөгөө талдаа иргэдээ бэлэнчлэх, халамжлуулах, сэтгэлгээнд автуулахгүй байх том зорилготой гэж үзэж байгаа учраас энэ хуулийн төслийг дэмжиж байна.
